دانيار الكەباي ۇلى ءبىرقاتار كاسىپورىننىڭ، سونىڭ ىشىندە الماتىدا دا توقتاپ قالۋىنا بايلانىستى حالىقتى جۇمىسپەن قامتۋ ماسەلەسى ەرەكشە وزەكتى بولا تۇسكەنىن اتاپ ءوتتى.
«تۇراقتى جۇمىس ورىندارىنا قاتىستى ايتسام، جىل باسىنان بەرى 23 مىڭنان اسا ادام جۇمىسقا ورنالاستى، قازىرگى ۋاقىتتا ەلەكترون ەڭبەك بيرجاسىندا 15 مىڭنان اسا بوس جۇمىس ورنى جاريالانعان. كەلىپ تۇسكەن ۇسىنىستارعا تالداۋ ناتيجەسىندە، جۇمىسشى ماماندىقتار، سونىڭ ىشىندە تەمىر ۇستاسى، دانەكەرلەۋشى، ەلەكترشى، جۇرگىزۋشى سۇرانىسقا يە ەكەنىن كورۋگە بولادى. سونداي-اق، قىزمەت كورسەتۋ سالاسىندا جانە مەديتسينا قىزمەتكەرلەرى، ياعني دارىگەرلەر، كىشى مەديتسينا قىزمەتكەرلەرى جانە باسقالارى سۇرانىسقا يە»، - دەدى دانيار الكەباي ۇلى.
دانيار الكەباي ۇلى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋعا باعىتتالعان «ەڭبەك» مەملەكەتتىك باعدارلاماسى قالالىقتارعا ۋاقىتشا جۇمىس ورىندارىن، مىسالى، قوعامدىق جۇمىستاردى ۇسىناتىنىن ايتتى.
«الماتىدا قوعامدىق جۇمىستارعا قاتىسقان ادامدارعا ەڭ تومەنگى جالاقى مولشەرىندە (ايىنا 85 مىڭ تەڭگە - اۆتور) ەكى ايلىق تولەنەدى. بۇگىندە وعان 12 مىڭ ادام قاتىسىپ ءجۇر. قوعامدىق جۇمىستارعا بارلىعى 15000 ادامدى جىبەرۋ جوسپارلانىپ وتىر. ءبىز وسى جۇمىستارعا نيەت بىلدىرگەندەردىڭ بارلىعىنا باعىت كورسەتۋگە دايىنبىز. كوبى مۇنى تەك كوشە، ساياباقتار مەن الاڭداردى تازارتۋ دەپ ويلايدى، ءبىراق نەگىزىندە بۇل قارتتارعا، مۇگەدەكتەرگە نەمەسە ەرىكتىلەر قوزعالىسىنا كومەكتەسۋ سياقتى جۇمىستار»، - دەدى ول.
سونىمەن قاتار، الەۋمەتتىك جۇمىس ورىندارى دا وتە تانىمال. جىل باسىنان بەرى بۇل جۇمىستارعا 1101 ادام كىرىسكەن. بۇل رەتتە مەملەكەت ەڭ تومەنگى جالاقىنى، ياعني 42500 تەڭگەنى سۋبسيديالايدى، ال جۇمىس بەرۋشى ءوز تاراپىنان قوسىمشا اقى بەلگىلەيدى.