4,5 اي بۇرىن Covid-19 بەن اۋىرىپ شىققان ەر ادامعا وسى دياگنوز ەكىنشى رەت قويىلدى.
ينفەكتسيانى انىقتاۋعا قايتادان تەست تاپسىرۋ كەزىندە پاتسيەنتتەن اۋرۋدىڭ ەش بەلگىسى بايقالماعان، دەپ حابارلايدى قازاقپارات BBC - گە سىلتەمە جاساپ.
ۆيرۋستى زەرتتەۋ ونىڭ ر ن ق- سى العاشقى ينفەكتسيانى تۋدىرعان SARS- Cov-2 شتاممىنىڭ گەنەتيكالىق كودىنان ايتارلىقتاي ەرەكشەلەنەتىنىن كورسەتتى.
عالىمدار Covid-19 ۆيرۋسىمەن اۋىرعان ادامداردىڭ ۆيرۋسقا قارسى يممۋنيتەتكە يە بولاتىنىن بىلەدى، ءبىراق بۇل قورعانىستىڭ قانشالىقتى ءتيىمدى ەكەنى جانە قانشا ۋاقىتقا سوزىلاتىنى ءالى بەلگىسىز. گونكونگتاعى پاتسيەنتتىڭ جاعدايى بۇكىل الەم بويىنشا 800 مىڭنان استام ادام قايتىس بولعان ۆيرۋسقا قارسى يممۋنيتەتتىڭ وتە قىسقا بولۋى مۇمكىن ەكەنىن كورسەتەدى.
33 جاستاعى گونكونگ تۇرعىنى Covid-19 بەن اۋىرىپ، ءساۋىر ايىندا اۋرۋحانادان جازىلىپ شىققان، دارىگەرلەر ونى اۋرۋدان تولىق ايىقتى دەپ مالىمدەگەن.
الايدا، تامىز ايىندا يسپانيادان ساپاردان ورالعاننان كەيىن ول اۋەجايدا مىندەتتى تەست تاپسىرعان.
ونىڭ ناتيجەسى ۆيرۋستىڭ بار ەكەنىن تاعى دا راستادى. بۇعان دەيىن قىتاي بيلىگى ۆيرۋستىڭ قايتا انىقتالۋىنىڭ بىرنەشە جاعدايى تۋرالى حابارلاعان بولاتىن.
ولاردىڭ مالىمەتتەرى بويىنشا، ناۋقاستاردىڭ %5-15 كوروناۆيرۋسپەن ەكىنشى رەت اۋىرعان. ءبىراق بۇل ادامدار ۆيرۋستى شىنىمەن قايتا جۇقتىردى ما، الدە ولار ءبىرىنشى رەت اۋىرعاندا تولىق ەمدەلمەدى مە، ول جاعى ناقتى ەمەس. بۇلاي سەنىمدى تۇردە ايتۋ مۇمكىن ەمەس.
گونكونگتەگى پاتسيەنتتەن اۋرۋدىڭ ەش بەلگىلەرى بايقالماعان. ەگەر ادامدار جاڭا ۆيرۋستى بىرنەشە رەت جۇقتىرۋى مۇمكىن ەكەنى بەلگىلى بولسا (مىسالى، تۇماۋ سياقتى)، ءتىپتى، ءتيىمدى ۆاكتسينا ۋاقىتىندا جاسالسا دا بۇل ۆاكتسيناتسيانى ايتارلىقتاي قيىنداتادى.
الايدا، د د ۇ قانداي دا ءبىر تۇجىرىم جاساۋعا ءالى ەرتە دەيدى. ويتكەنى بىزدە قايتا جۇقتىرۋ جاعدايى جالعىز عانا. گونكونگتىق پاتسيەنتتى تەكسەرۋ ناتيجەلەرى عىلىمي ادەبيەتتەردە ءالى جاريالانباعان، سوندىقتان بۇل جاعدايدىڭ كوپتەگەن اسپەكتىلەرى ءالى انىق ەمەس.