«بيىلعى دەمالىس ماۋسىمىندا وتاندىق تۋريستەردىڭ باستى نازارىندا ماڭعىستاۋ، بۋراباي، الاكول كۋرورتتىق ايماقتارى بولىپ وتىر. سونىمەن قاتار، جاڭادان اشىلعان تۋريستىك ورىندار جوعارى سۇرانىسقا يە. ونىڭ ىشىندە، ەلوردا ىرگەسىندەگى كوبەيتۇز كولى جانە وعان تەڭدەس پاۆلودار وبلىسىنداعى كورياكوۆكا كولى. ودان بولەك، اقمولا وبلىسىنداعى بەستوبە شاتقالى مەن سىلەتى سۋ قويماسى جانە الماتى وبلىسىنداعى تەكەس سارقىراماسى»، - دەپ جاۋاپ بەردى «Kazakh Tourism» ۇلتتىق كومپانياسى قازاقپارات ءتىلشىسى جولداعان ارنايى ساۋالعا.
سونداي-اق، ۇلتتىق كومپانيانىڭ سوڭعى ۋاقىتتا ءجيى ورىن الىپ جاتقان تۋريستەردىڭ دەمالىس ورىندارىن لاستاۋعا قاتىستى ۇستانىمىن بىلدىك.
«تۋريزمدە، كەز-كەلگەن بيزنەستەگىدەي، نارىقتىق مەحانيزمدەر جۇمىس ىستەيدى. سۇرانىس بولسا، الەۋمەتتىك جەلىلەردە بەلسەندى جارناما جۇرگىزىلسە، وسىنداي بىرەگەي ورىندارعا تۋريستىك اعىن وسە باستايدى. الايدا، بۇل باقىلاۋسىز اعىن تابيعي نىساننىڭ ەكوجۇيەسىنە كەرى اسەرىن تيگىزەدى. سول سەبەپتى ەلىمىزدە بىرەگەي نىساندار قورعاۋعا الىنادى. قازاقستان اۋماعىندا تۋريستەردى قىزىقتىراتىن ورىن كوپ، الايدا مەملەكەتتىك ورگانداردا بارلىق تەرريتوريالاردى باقىلاۋعا جەتكىلىكتى رەسۋرسى جوق. سوندىقتان ءبىز تۋريستىك رەسۋرستاردى ۇقىپتى پايدالانۋعا شاقىرامىز جانە جاقىن ارادا وسى ماسەلە بويىنشا الەۋمەتتىك جەلىلەردە بەلسەندى جۇمىستى باستايمىز»، - دەلىنگەن مالىمەتتە.