بالالار ءۇشىن كاۆاساكيگە ۇقساس سيندروم قانشالىقتى قاۋىپتى

نۇر- سۇلتان. قازاقپارات - «پەدياتريا جانە بالالار حيرۋرگياسى عىلىمي ورتالىعى» ا ق باسقارما ءتورايىمى، مەديتسينا عىلىمىنىڭ دوكتورى ريزا بورانبايەۆا بالالار اراسىنداعى كاۆاساكي ءتارىزدى سيندروم تۋرالى ايتتى، دەپ حابارلايدى قازاقپارات ءتىلشىسى.

«2020 -جىلدىڭ ءساۋىر- مامىرىندا COVID-19 ىندەتىنە شالدىعۋ دەڭگەيى جوعارى بولعان ەلدەردە بالالار اراسىندا كوروناۆيرۋس ىندەتىن ەڭسەرگەننەن كەيىن پەدياتريالىق مۋلتي جۇيەلىك قابىنۋ سيندرومى فورماسىندا جاڭا اۋرۋ تىركەلە باستالدى. ول ۋاقىتشا COVID-19 ىندەتىمەن بايلانىستىرىلدى. وسى پاتولوگيا پوستينفەكسيالىق سيندروم بولىپ سانالادى، COVID-19-عا شالدىققاننان كەيىن 3-5 اپتادان سوڭ بايقالادى. بۇعان ناۋقاستاردىڭ قانىنداعى انتيدەنەلەر دالەل بولادى. ونىڭ باسقاشا اتاۋى - كاۆاساكي ءتارىزدى سيندروم. ويتكەنى، ول كاۆاساكي اۋرۋىمەن كلينيكالىق جاعىنان ۇقساس، الايدا ءتيىستى ايىرماشىلىقتارى بار. ولاردىڭ نەگىزگىسىنە توقتالساق، كاۆاساكي اۋرۋى كىشكەنتاي بالالاردا بايقالادى، ياعني كوبىنە ەكى جاستاعىلار اراسىندا»، - دەدى دارىگەر.

ونىڭ ايتۋىنشا، مۋلتي جۇيەلىك قابىنۋ سيندرومىن ەمدەۋدەگى ەڭ باستىسى - ول ەرتە كەزەڭدە دياگنوستيكادان وتكىزۋ. كاۆاساكي ءتارىزدى سيندرومنىڭ نەگىزگى كلينيكالىق سيمپتومىنا توقتالساق، 24 ساعات ىشىندە دەنە قىزۋىنىڭ جوعارى بولۋى بايقالادى.

«مۋلتي جۇيەلىك قابىنۋ سيندرومىنا كۇدىك بولسا، بالانى اۋرۋحاناعا جاتقىزىلۋى كەرەك»، - دەدى ر. بورانبايەۆا.

ونىڭ سوزىنە قاراعاندا، بۇگىندە ەلىمىزدە بالالار اراسىندا كاۆاساكي ءتارىزدى سيندرومعا شالدىعۋدىڭ 16 وقيعاسى تىركەلدى. سونىڭ ىشىندە 8 بالا ەمدەلىپ شىقتى، ال قالعاندارى اۋرۋحانالاردا ەم قابىلداۋدا.

اۆتور: رۋسلان عابباسوۆ