ەلوردادا ەرەكشە قاجەتتىلىكتەرى بار بالالاردى وقىتۋ نىساندارى ارتادى

«ەگەر بىلتىر ينكليۋزيۆتى بىلىممەن قامتۋ 80 پايىز بولسا، بيىل ءبىز بۇل كورسەتكىشتى 100 پايىزدىق دەڭگەيگە جەتكىزۋدى جوسپارلاپ وتىرمىز. تۇڭعىش پرەزيدەنت - ەلباسى قورىنىڭ باستاماسىمەن ەكى جاڭا مەكتەپتىڭ نەگىزىندە 1-قىركۇيەككە دەيىن 30 ورىندىق 2 ينكليۋزيۆتى قولداۋ بولمەلەرى اشىلادى. شىلدەدەن اسىل ميراس كابينەتى جۇمىس ىستەي باستادى. وندا حالىقارالىق سەرتيفيكاتقا يە جانە زاماناۋي ادىستەمەلەردى مەڭگەرگەن ماماندار جۇمىس ىستەيدى. سونداي-اق، قىركۇيەك ايىندا زياتكەرلىك قابىلەتى تومەن 100 بالاعا ارنالعان №3-ارنايى مەكتەپ اشۋدى جوسپارلاپ وتىرمىز. كۇزدە كورۋ قابىلەتى ناشار بالالارعا ارنالعان بالاباقشا اشامىز»، - دەدى ەلوردا اكىمى.

سونداي-اق ونىڭ ايتۋىنشا، جاڭا وقۋ جىلىندا ەلوردالىق مەكتەپتەردە قوسىمشا ءبىلىم بەرۋدىڭ 8 فيليالى جانە تاعى 2 قوعامدىق ورتالىق اشىلاتىن بولادى. جاڭا نىسانداردىڭ ءبىرىنشى قاباتىندا بالالارعا ارنالعان شاعىن ورتالىقتار، وڭالتۋ ورتالىقتارى، بالاباقشالار، مەديتسينالىق ورتالىق اشىلۋ ۇستىندە. جالپى بيىل 12 مەكتەپ سالىنادى. بۇل وتكەن جىلعى كورسەتكىشتەن 2 ەسە كوپ. 2021 -جىلى دا وسى مولشەردە ءبىلىم ورداسى سالىنادى.

اۆتور: مارلان جيەمباي