شەتەلگە ەمدەلۋگە بارعان ول كارانتينگە تاپ بولىپ، ەلگە ورالا الماي قالعان. اقىر سوڭىندا اقشاسى دا تاۋسىلىپ، ءتىلى، ءدىنى بولەك ەلدە ءوز كۇنىن ءوزى كورۋگە ءماجبۇر بولعان. گلۋبوكوە اۋدانى پەريەۆالنوە اۋىلىنىڭ تۇرعىنى ەۆگەنيي كولەسنيكوۆ وتكەن جىلدىڭ قاراشا ايىندا ءۇندىستاننىڭ رۋحاني ورتالىقتارىنىڭ ءبىرى سانالاتىن ماياپۋرعا ەمدەلۋگە بارادى. ناۋرىز ايىندا ەلگە قايتۋدى جوسپارلايدى. الايدا، سول ەلدى مەكەندە شىلدەگە دەيىن قالۋعا تۋرا كەلگەن. ويتكەنى الەمدى جايلاعان ىندەتكە وراي كارانتين باستالىپ كەتكەن ەدى. ءسويتىپ، ساپارىنان جاڭىلعان ازامات جات ەلدە كۇن كورۋگە ءماجبۇر بولعان.
«ول جاقتا سونشالىقتى كوپ بولام دەپ جوسپارلاعان جوقپىن عوي، سوندىقتان قاراجاتىم تاۋسىلدى. بانكتەر جابىق. تىعىرىققا تىرەلگەن سوڭ بوس وتىرماي جۇمىس ىزدەۋگە كىرىستىم. ول جەردە 1 مىڭنان استام عيباداتحانا بار ەدى. سوندا ءتۇرلى قىزمەتتەر اتقاردىم. بىرىندە سۋ قۇبىرىن، ەكىنشىسىنىدە تۇرمىستىق تەحنيكا جوندەپ، ءناپاقا تاپتىم. سونىمەن قاتار ورىس ءتىلىن بىلەتىندەرمەن «ماياپۋر جاڭالىقتارى» دەگەن ورتاق چات قۇرىپ، ءبىر- بىرىمىزگە كومەك، كەڭەس بەرىپ تۇردىق»، - دەيدى ەۆگەني كولەسنيكوۆ.
وسى ارالىقتا ەۆگەنيدىڭ اناسى ونى ەلگە قايتارىپ الۋ ءۇشىن ءتيىستى ورگاندارعا جۇگىنگەن. «اكىمدىككە بارىپ، سونداعى ماماندار جول سىلتەدى. وبلىستىق تۋريزم باسقارماسىنا شىعىپ، ولار ارى قاراي ەلشىلىككە حابارلاستى. ءسويتىپ، ەلشىلىك وكىلدەرى ۇلىمدى قازاقستانعا تەگىن جەتكىزىپ بەردى. باسىنان اياعىنا دەيىن وزدەرى باقىلاپ تۇردى. قۋانىشىمدا شەك بولمادى. سول ءۇشىن بارلىعىنا العىسىمدى بىلدىرەمىن»، - پەريەۆالنوە اۋىلىنىڭ تۇرعىنى نادەجدا گەينتس.