ەرالى توعجانوۆ بالاباقشالاردىڭ جۇمىس ساپاسى كورسەتكىشىن شۇعىل ەنگىزۋدى تاپسىردى
«ءبىلىم بەرۋ سالاسىندا كۇردەلى مىندەتتەر تۇر. بۇگىندە ءبىلىم بەرۋ جۇيەسىندە كوپ پروبلەمالار جيناقتالىپ قالدى. ونىڭ ىشىندە بالالاردىڭ قاۋىپسىزدىگى، ولاردىڭ تاربيەلىك جانە بىلىمدىلىك دەڭگەيى، پەداگوگتاردىڭ كاسىبيلىگى، يننوۆاتسيالار سانى بار. الەمدىك رەيتينگتەردىڭ مالىمەتتەرىنە سايكەس، قازاقستان بالا تاربيەسى بويىنشا سوڭعى 73-ورىنعا تۇراقتادى. PISA ناتيجەسى وقۋشىلاردىڭ ساۋاتتىلىعى تومەندىگىن كورسەتتى. سوندىقتان بايىپتى ساراپتاما قاجەت. ءبىلىمنىڭ بارلىق ساناتىنداعى جاعدايدى جاقسارتۋ بويىنشا بۇكىل شارالاردى قابىلداۋ كەرەك»، - دەدى ەرالى توعجانوۆ پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى بارىسىندا.
سونىمەن قاتار ول ەلىمىزدە بالاباقشالار سانىنىڭ ارتا تۇسكەندىگىن، سوڭعى 3 جىلدا عانا 891 بالاباقشا اشىلعاندىعىن ايتا كەلە، ساپا ماسەلەسىنە ەرەكشە توقتالدى.
«بۇگىندە ولار قوعامنىڭ دا، اتا- انالاردىڭ دا كوڭىلىنەن شىقپايدى. بۇل پروبلەمانى جان باسىنا قارجىلاندىرۋ دا شەشە المايدى. بارلىعى ءۇشىن بىردەي مەملەكەتتىك تاپسىرىس جەكەمەنشىك جانە مەملەكەتتىك بالاباقشالاردا ءارتۇرلى ورنالاستىرىلادى. بۇل جۇمىس ساپاسىنا بەلگىلى ءبىر دەڭگەيدە كۇدىك تۋدىرادى. بالالاردىڭ كەزەگى ساقتالىپ، كەزەككە قويۋ باياۋ اۆتوماتتاندىرىلۋدا. بالالاردىڭ 40 پايىزى عانا ەلەكتروندى جولداما العان»، - دەدى ول.
پرەمەر- مينيستر ورىنباسارىنىڭ دەرەگىنشە، ەلىمىزدە تاربيەشىلەردىڭ 25 پايىزدان استامىندا بالاباقشادا جۇمىس ىستەۋگە قاجەتتى ءبىلىمى جوق.
«الەمدىك تاجىريبەدە قابىلدانعان بالاباقشالاردىڭ جۇمىس ساپاسى كورسەتكىشىن شۇعىل ەنگىزۋدى تاپسىرامىن. بۇل كورسەتكىشتە اتا- انالاردىڭ قاناعاتتانۋشىلىق دەڭگەيىن، قوعام باعاسىن، بالالاردىڭ دامۋى دەڭگەيىن، تاماقتانۋ ساپاسىن قوسۋ قاجەت»، - دەدى ەرالى توعجانوۆ.
اۆتور: مارلان جيەمباي