راسىمەن، ادامدى ادام ەتەتىن - ونىڭ قاراپايىمدىلىعى مەن ادامگەرشىلىگى. بارىنا قاناعات، جوعىنا سابىر ەتكەن، قولىنداعى بارىن بارىمەن بولىسكەن جان شىنايى باقىتتى.
بۇعان قولىندا بيلىگى مەن قالتاسىندا قارجىسى بولا تۇرا، بارىنەن باس تارتىپ، قاناعات ءومىردى قاعيدا تۇتقان تۇلعالار دالەل بولماق.
الەمنىڭ جومارت، قاراپايىم ازاماتتارى جايلى كوپ ەستىگەنىمىز انىق، بايلىعى مەن بيلىگىن سارپ ەتىپ، كەدەيشە ءومىر سۇرگەن پرەزيدەنتتەر تۋرالى از ەستىگەن بولارمىز. كوبىمىز ەستىسەك تە، سەنبەۋىمىز مۇمكىن.
قازىرگى كۇندە بۇلاردىڭ بىرەۋى شوپان، ەندى بىرەۋى باعبان. قازىر ولاردى ءبىر كەزدەرى ەل باسقارعان ەلباسىلار بولعان دەۋگە سەنۋ قيىن. ەندەشە الەمنىڭ كەدەي پرەزيدەنتتەرى جايلى ءسوز قوزعاساق.
حوسە مۋحيكا
«الەمنىڭ ەڭ كەدەي پرەزيدەنتى كىم؟» دەگەندە بىردەن ۋرۋگۆاي پرەزيدەنتى حوسە مۋحيكا ەسكە تۇسەدى. BBC ونى 2018-جىلى «الەمنىڭ ەڭ كەدەي پرەزيدەنتى» دەگەن اتاق بەرەدى. سودان بەرى الەم ونى ەڭ كەدەي پرەزيدەنت دەپ تانيدى.
2010-2015-جىلدارى ەل باسقارعان پرەزيدەنتى حالقى ەركەلەتىپ «پەپە» دەيدى. «ماعان تاريحتا ەمەس، حالقىمنىڭ جۇرەگىندە قالعانىم ماڭىزدى» دەيدى حوسە مۋحيكا.
راسىندا دا، 2015-جىلى پرەزيدەنتتىكتەن، 2018-جىلى سەناتورلىقتان كەتىپ، زەينەتاقىدان باس تارتقان پەپە ەل ەسىندە ماڭگى قالارى انىق.
قوزعالىسقا قاتىسقان
1935-جىلى دۇنيەگە كەلگەن حوسە مۋحيكانىڭ ساياساتقا كەلۋى، ەل ومىرىنە ارالاسۋى وڭاي بولعان جوق. 1953-59-جىلدارى فيدەل كاسترو باستاعان كۋبا ريەۆوليۋتسياسىنان شابىت العان لاتىن امەريكا ەلدەرىندە بىرىنەن كەيىن ءبىرى دەموكراتيا مەن قۇقىق بوستاندىعى ءۇشىن قوزعالىس باستالدى. سونداي قوزعالىستاردىڭ (ۋرۋگۆايدا «تۋپاماروس» پارتيزان قوزعالىسى بولعان) قاتارىندا حوسە مۋحيكا دا بولدى. قارۋلى قاقتىعىسقا قاتىسىپ، بىرنەشە رەت جارالانعان. 14 جىل اسكەري تۇرمەگە قامالعان. ءبىراق مۇنىڭ بىردە-ءبىرى پەپەنىڭ ءاۋ باستاعى ماقساتى مەن نيەتىنەن قايتارعان ەمەس.
2005-2008-جىلدارى ۋرۋگۆايدىڭ اۋىل شارۋاشىلىق ءمينيسترى، كەيىن سەناتور بولدى. ال 2009-جىلى پرەزيدەنتتىك سايلاۋعا قاتىسىپ، 2010-جىلدىڭ 1- ناۋرىزىنان باستاپ رەسمي تۇردە پرەزيدەنت قىزمەتىنە كىرىسەدى.
ەل باسقارعان جىلدارى حالىقتىڭ ءال-اۋقاتىن كوتەرۋ مەن ەركىن نارىق قالىپتاستىرۋ، ءسوز بوستاندىعى مەن دەموكراتيا ورناعان قوعام قۇرۋ ءىسىن قولعا الدى.
مۋحيكا بيلىگى كەزىندە ۋرۋگۆاي الەمنىڭ ەڭ تولەرانتتى ەلدەرىنىڭ بىرىنە اينالدى. سونىڭ ارقاسىندا ەلدىڭ ج ءى ءو ءوستى: قازبا بايلىعى جوق، شەكاراسى شاعىن ەلدىڭ جىلدىق ءوسىم كورسەتكىشى - %5,7 عا جەتتى. اۋىل شارۋاشىلىعى مەن ونەركاسىپ دامىدى. كەدەيلەر سانى ازايدى.
جالاقى مەن زەينەتاقىدان باس تارتقان
ەل ەكونوميكاسىن كوتەرۋگە ايانباي ەڭبەك ەتكەن حوسە مۋحيكا العان جالاقىسىنىڭ 90 پايىزىن قايىرىمدىلىققا - تۇرمىسى ناشار جانۇيالارعا باسپانا سالۋعا جۇمساعان. ياعني، جالاقىسى - $12500 بولسا، ونىڭ $1250 عانا ءوزى العان.
ايەلى دە ەڭبەكاقىسىن قايىرىمدىلىققا بەرگەن. پرەزيدەنتتىك قىزمەتتە بولا تۇرا، رەزيدەنتسيادا تۇرۋدان، كۇزەت پەن كورتەجدەن باس تارتقان، ەل استاناسى - مونتيەۆيدەو قالاسىنىڭ جانىنداعى اياداي ۇيىندە عانا تۇرعان. ءتىپتى، لاشىق دەۋگە بولادى.
«ءۇيدىڭ توبەسىنەن سۋ اقپاسا بولدى ەمەس پە؟!» دەيدى پەپە. ۇيىندە سۋ جوق، قۇدىقتان الادى. قازىر شاعىن فەرماسى بار، گۇل ءوسىرىپ ساتادى.
ال ومىرىندەگى ساتىپ العان ەڭ قىمبات دۇنيەسى - 1987-جىلعى فولكسۆاگەن جۋك كولىگى. قۇنى - $1945.
پرەزيدەنتتىڭ ومىرگە دەگەن كوزقاراسى دا قاراپايىم.
- عۇمىرىن تابىس تابۋ مەن اقشا جۇمساۋعا ارناعان ادامنىڭ ويى دا، ساناسى دا بايلاۋلى. ماتەريالدىق قۇندىلىققا بەي-جاي قاراعان ادامنىڭ دا ءومىرى ەركىن، - دەيدى پەپە.
پرەزيدەنتتىك قىزمەتتەن كەيىن حوسە مۋحيكا سەناتورلىقتا بولعان. ونىڭ مەرزىمى 2020-جىلعا دەيىن بولسا دا، پەپە 2018-جىل سەناتورلىقتان باس تارتىپ، باسقا ساياساتكەرلەرگە ورنىن بوساتىپ بەردى. ودان بولەك، سەناتورلىق زەينەتاقىدان دا باس تارتقان. «باسشى كەتەدى، حالىق قالادى» دەيدى كوسەم.
ماحمۋد احمادينەجاد
2005-2013-جىلدارى يراننىڭ پرەزيدەنتى بولعان. مەنشىگىندە يراننىڭ كەدەي اۋدانىندا اكەسىنەن قالعان ءبىر ءۇي مەن 1977-جىلى شىققان ەسكى كولىگى عانا بار.
بايلىق پەن ءسان-سالتاناتتى اسا ۇناتپايتىن ادام. سوندىقتان العاش پرەزيدەنتتىككە كىرىسكەندە- اق قىزمەت بولمەسىندە تۇرعان قىمبات پارسى كىلەمىن الىپ، مەشىتكە بەرىپ جىبەرگەن. ونىڭ ورنىنا ارزان كىلەم اكەپ سالعان ەكەن.
ال تۇسكى اسىن سومكەسىنە سالىپ اكەلەتىن بولعان. استى جۇبايى دايىنداپ بەرەتىن كورىنەدى. ءىس-ساپاردا جۇرگەندە قوناق ءۇيدىڭ ەڭ ارزان بولمەسىن جالعا الادى ەكەن. سەبەبى پرەزيدەنت جەردە جاتقاندى جاقسى كورەتىن.
2013-جىلى وتستاۆكاعا كەتكەننەن كەيىن «زەينەتاقى ءۇشىن ەمەس، حالقىم ءۇشىن ەڭبەك ەتتىم» دەپ پرەزيدەنتتىك زەينەتاقىدان دا باس تارتقان.
قازىر تەگەران ۋنيۆەرسيتەتىندە ءدارىس وقيدى. ايلىعى - $300. ايتۋىنشا، جالاقىسى تۇرمىسىنا تولىق جەتەدى. ال ايەلى ەدەن جۋۋشى بولىپ ىستەيدى.
ماحمۋد احمادينەجاد بالا كۇنىنەن قوي باققان ۇناتادى. قازىر دە اراسىندا قوي باعۋعا شىعاتىن كورىنەدى. جۇمىسىنا قوعامدىق كولىكپەن بارىپ قايتادى. كەيدە كوشەدە اۋلا سىپىرۋشىعا دا كومەكتەسەدى ەكەن.
تاريحتا ۋگو چاۆەس، توماس يسيدور سانكارا سىندى كەدەي پرەزيدەنتتەر بولعان. حوسە مۋحيكانىڭ ءوزى ۆەنەسۋەلانىڭ اتاسى ۋگو چاۆەستى «ەڭ جومارت كوسەم» دەپ اتاعان.
ال بۋركينا- فاسو اتتى شاعىن ەلدىڭ پرەزيدەنتى توماس سانكارانى ەستىگەندەر از. ⅩⅩ عاسىردىڭ ورتاسىندا ءومىر سۇرگەن كوسەم. جالاقىسىن بالالارعا ارنالعان قايىرىمدىلىق قورىنا اۋدارىپ وتىرعان. ەسكى كولىگى مەن ءتورت ۆەلوسيپەدى عانا بولعان. ۇيىنە جەلدەتكىش ورناتۋعا قارجىسى بولماعان دەسەدى.
قازاق باسشىلارى اراسىندا دىنمۇحاممەد قونايەۆتىڭ ءومىرى كوپكە ۇلگى بولارى حاق، كىشىپەيل باسشى بولعان جان. جۇمىسقا جاياۋ بارىپ-قايتاتىن. كۇزەتتەن باس تارتقان. عۇمىر بويى قىزمەتتىك ۇيدە تۇرعان. ءۇيىن جازۋشى ءالجاپپار ابىشيەۆكە سىيعا تارتقان ەكەن.
«اكادەميك» دارەجەسى ءۇشىن تولەنەتىن تولەماقىدان باس تارتىپ، ونى بالالار ۇيىنە بەرىپ وتىرعان. قاراپايىم ءومىر سۇرگەنى سونشالىق - لەونيد برەجنيەۆ قونايەۆتىڭ ۇيىنە ءبىرىنشى رەت قوناق بوپ كەلگەندە «بار دۇنيەڭ وسى ما؟» دەپ تاڭىرقاعان كورىنەدى.
massaget.kz