19- تامىزدا ساۋدا جانە ينتەگراتسيا مينيسترلىگى «ىشكى ساۋدا قاعيدالارىن بەكىتۋ تۋرالى» ق ر ۇلتتىق ەكونوميكا ءمينيسترىنىڭ م. ا. 2015-جىلعى 27- ناۋرىزداعى 264№ بۇيرىعىن وزگەرتتى.
ەسكە سالا كەتسەك، ق ر حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكسىنىڭ 110-بابىنا سايكەس الكوگول ونىمدەرى مەن تەمەكى بۇيىمدارىن، (قورقورعا ارنالعان تەمەكىنى، قورقور قوسپاسى) ساتۋشى ساتىپ الۋشىدان جەكە باسىن كۋالاندىراتىن قۇجاتتى كورسەتۋدى تالاپ ەتۋگە، ەگەر قۇجات ۇسىنىلماعان جاعدايدا اتالمىش تاۋاردى ساتۋدان باس تارتۋعا قۇقىلى.
مينيسترلىك باسپا ءسوز قىزمەتىنىڭ حابارلاۋىنشا، جاڭا كودەكس قابىلدانعاننان كەيىن الكوگول مەن تەمەكى ءونىمىن ساتىپ الۋ كەزىندە بارلىق ساتىپ الۋشىعا جەكە باسىن كۋالاندىراتىن قۇجاتىن ۇسىنۋ قاجەتتىلىگىنە بايلانىستى ازاماتتاردىڭ شاعىمى جيىلەپ كەتكەن.
«كودەكس بويىنشا بارلىق ساتىپ الۋشى ساتۋشى ونىڭ جاسىن انىقتاۋ ءۇشىن جەكە باسىن كۋالاندىراتىن قۇجاتىن ۇسىنۋعا مىندەتتى. ەگەر قۇجاتتى تەكسەرگەننەن كەيىن ساتىپ الۋشىنىڭ جاسى 21 جاستان اسقان بولسا، تەك وسى جاعدايدا ساتۋشى تاۋاردى ساتادى»، دەلىنگەن حابارلامادا. الكوگول مەن تەمەكىنى ساتىپ الۋشىنىڭ 21 جاسقا تولعانىنا ساتۋشىنىڭ كۇمانى بولعان جاعدايدا عانا جەكە باسىن كۋالاندىراتىن قۇجاتتى تالاپ ەتەدى.