ۇلتتىق بانك ەلەكتروندىق ءامياندى پايدالانۋدىڭ جاڭا ەرەجەلەرىن ءتۇسىندىردى
ەلەكتروندىق ءامياندار - ىڭعايلى تولەم قۇرالى. ولاردىڭ كومەگىمەن تاۋارلاردىڭ اقشاسىن تولەپ، كوممۋنالدىق قىزمەتتەر، سالىقتار جانە باسقا دا كۇندەلىكتى ترانزاكتسيالاردى جۇرگىزۋگە بولادى.
«بۇل سەرۆيستەردىڭ تانىمالدىلىعى كۇننەن كۇنگە وسۋدە. ەلەكتروندىق ءامياندار بويىنشا قىزمەتتى بانكتەر جانە دە ۇلتتىق بانكتە تىركەۋدەن وتكەن تولەم ۇيىمدارى كورسەتەدى. وسى قىزمەت بويىنشا ولاردىڭ اينالىمى 580 ميلليارد تەڭگەنى قۇرادى. 2020 -جىلدىڭ 17 -شىلدەسىندە ەلەكتروندىق ءامياندار قولدانۋ سالاسىن جەتىلدىرۋ ءۇشىن ءبىز ازىرلەگەن جاڭا زاڭنامالىق تۇزەتۋلەر كۇشىنە ەندى»، - دەيدى ۇلتتىق بانكتىڭ تولەم جۇيەلەرى دەپارتامەنتىنىڭ ديرەكتورى ەرلان اشىقبەكوۆ.
نەگىزگى ماقسات - اقشانى جىلىستاتۋ جانە باسقا دا زاڭسىز وپەراتسيالار ءۇشىن ەلەكتروندىق ءاميانداردى پايدالانۋ مۇمكىندىگىن بولدىرماۋ. ول ءۇشىن ءانونيمدى پايدالانۋشىلار اراسىندا اۋدارىمدارعا تىيىم سالىنىپ، ولار ءۇشىن اقشا شىعارۋعا شەكتەۋ ەنگىزىلدى.
«بۇل جالپى الەمدىك تاجىريبە مەن ءۇردىس. كوپتەگەن ەلدەر وسىنداي ەرەجەلەر ەنگىزۋدە، قازاقستان دا وسى قاتاردا. سونىمەن قاتار، تاۋارلار مەن قىزمەتتەردى بۇرىنعىداي سايكەستەندىرۋ ءراسىمىن وتپەستەن، سونىڭ ىشىندە تەرمينالدار ارقىلى تولەۋ مۋمكىندىگى ساقتالىپ كالدى. جالعىز نارسە - تولەمدى تەك سايكەستەندىرىلگەن پايدالانۋشىلار عانا الا الادى جانە سوماسى 50 اەك- تەن اسپاۋى كەرەك»، - دەپ ءتۇسىندىردى بانك وكىلى.
سايكەستەندىرۋ تولىق جانە جەڭىلدەتىلگەن بولىپ ەكىگە بولىنەدى. كليەنت تولىق سايكەستەندىرۋدى وتكەن جاعدايدا ونىڭ ەلەكتروندىق اميانمەن جۇرگىزىلەتىن وپەراتسيالارىنا قانداي دا ءبىر شەكتەۋلەر قويىلمايدى. جەڭىلدەتىلگەن سايكەستەندىرۋدى قاشىقتان قىزمەت كورسەتۋ سەرۆيستارى ارقىلى وتۋگە بولادى.
«بىرىنشىدەن، ءاميان يەسى باسقا قولدانۋشىلاردان اقشا اۋدارىمدارىن قابىلداي الادى. ەكىنشىدەن، وپەراتسيالار ءليميتى 2 ەسە 100 ا ە ك- كە دەيىن كوتەرىلەدى. ۇشىنشىدەن، اقشالاردى ەلەكتروندىق ءاميان ارقىلى ءوز شوتىنا نە تولەم كارتوچكاسىنا شىعارۋعا بولادى» ،- دەيدى دەپارتامەنت ديرەكتورى. وسى جاڭاشىلدىقتىڭ ارقاسىندا، كاسىپكەرلەر قولما- قول اقشاسىز تولەمدەردى قابىلداۋ بويىنشا ترانزاكتسيالىق شىعىندارىن ازايتادى.
«بۇرىن كاسىپكەرلەر ءامياندى قولدانعاندا الدىمەن تولەمدەردى قابىلداپ، سوسىن اقشانى بانكتىك شوتقا شىعارۋ كەرەك بولاتىن. بۇل قوسىمشا ۋاقىت الىپ، قوسىمشا شىعىنعا ۇشىراتاتىن. وسى شەكتەۋ الىنىپ تاستالدى، ەندى كاسىپكەرلەر ەلەكتروندىق ءامياندى ەسەپ ايىرىلىسۋ ءۇشىن پايدالانىپ، باسقا كاسىپكەلەرمەن تىكەلەي جۇمىس ىستەي الادى»، - دەپ تولىقتىردى سپيكەر.