كوروناۆيرۋسقا قارسى يممۋنيتەتتى قالاي كوتەرۋ كەرەك

نۇر- سۇلتان. قازاقپارات - استانا مەديتسينا ۋنيۆەرسيتەتى پروفيلاكتيكالىق مەديتسينا جانە نۋتريتسيولوگيا كافەدراسىنىڭ دوتسەنتى روزا سۇلەيمەنوۆا كوروناۆيرۋس ينفەكسياسىنا قارسى يممۋنيتەتتى كوتەرۋ ءۇشىن قانداي شارالار قابىلداۋ كەرەكتىگىن ءتۇسىندىردى.

- روزا قالدىبەك قىزى، كوروناۆيرۋس تاقىرىبى وزەكتى بولىپ تۇرعان كەزدە يممۋنيتەتتى كوتەرۋ ماسەلەسىنە قوعام ەرەكشە ءمان بەرىپ وتىر. وسى ورايدا قانداي كەڭەس بەرەر ەدىڭىز؟

- ەڭ باستىسى - يممۋنيتەتتى السىرەتپەي، دۇرىس تاماقتانۋ كەرەك. يممۋنيتەتتى كوتەرۋ تاقىرىبىنا توقتالساق، اقۋىزى كوپ تاعامدارعا ءمان بەرۋ كەرەك. ولارعا تاۋىق، بالىق، ءىرى قارا، سونىڭ ىشىندە جىلقى ەتى جاتادى. وسىلاردىڭ سورپاسىنىڭ قۇرامىندا اقۋىز كوپ. سول سەبەپتى بۇل تاعامداردى مىندەتتى تۇردە ەسكەرگەن ماڭىزدى. سونىمەن قاتار، ءتۇرلى جاڭعاقتاردى الۋ كەرەك. يممۋنيتەتتى كوتەرۋ ءۇشىن 30-40 پايىزىن اقۋىزدان قۇراساق، قالعان 50-60 پايىزىن كوكونىستەر مەن جەمىس- جيدەكتەر ارقىلى قامتىعان دۇرىس بولادى.

جاز ايلارىندا الما، المۇرت، بانان، قۇلپىناي، قاراقات، تاڭقۋراي، يتمۇرىندى كوبىرەك العان ءجون. بۇلار تابيعي ءونىم بولعاندىقتان، س ۆيتامينىنىڭ كوزى. اتاپ ايتقاندا، سۇيىقتىقتى كوپ ىشكەن ابزال. كۇنىنە 3-5 ليترگە دەيىن سۋ، كومپوت جانە مورس ىشۋگە بولادى. اعزاعا س ۆيتامينى وتە قاجەت.

- ماماندار ادامنىڭ جاقسى كوڭىل- كۇيى يممۋنيتەتتى كوتەرۋگە ەرەكشە اسەر ەتەتىنىن ايتىپ جاتىر. ءسىزدىڭ پىكىرىڭىزدى بىلسەك.

- كوتەرىڭكى كوڭىل- كۇي اۋىرىپ قالماۋعا كوپ سەپتىگىن تيگىزەدى. كۇيزەلىسكە تۇسپەگەن دۇرىس. ەگەر كوڭىل- كۇيىمىز جاقسى بولىپ، جىگەرلەنىپ جۇرسەك، يممۋنيتەت تە جاقسى كوتەرىلەدى. سارى ۋايىمعا سالىنىپ جۇرسە، يممۋنيتەت تە السىرەيدى. سوندىقتان ۇنەمى پوزيتيۆتى بولۋ قاجەت. ەشقاشان بايبالام سالماي، ۋايىمداماي، بارىنشا سابىر ساقتاپ، جاقسىلىقتان ءۇمىت ەتۋ كەرەك. ويتكەنى، يممۋندىق جۇيە وسىعان تىكەلەي بايلانىستى.

- جالپى، ادامدار پروفيلاكتيكالىق شارالارعا قاتىستى نەنى ءبىلۋى شارت؟

- كوبىنە دۇكەن مەن ءدارىحاناعا بارامىز. بۇل نىسانداردىڭ كاسسالارىندا كەي جاعدايدا كەزەك بولىپ جاتادى. وسى ورايدا ارا قاشىقتىقتى ساقتاۋعا ءمان بەرگەن دۇرىس. ۇيدەن شىققاندا مەديتسينالىق ماسكانى تاعىپ، ارنايى قولعاپ كيىپ، قولعا انتيسەپتيك الۋ قاجەت. ۇيگە كىرگەن بويدا قولىمىزدى سابىنمەن جۋامىز. بولمەنى كۇنىنە كەمىنە 3-4 رەت جەلدەتكەن ابزال، سونداي- اق ىلعالدى تازالىق شارالارىن جۇرگىزۋگە كەرەك. سونىمەن قاتار، ءوز بەتىڭىزشە ەمدەلمەي، اۋەلى ەمحاناداعى ۋچاسكەلىك دارىگەرمەن نەمەسە جەدەل جاردەمگە حابارلاسىپ، سونداعى ماماندارمەن اقىلداسۋعا شاقىرامىن. باسىڭىز اۋىرىپ، قۇرعاق جوتەل، ەنتىگۋ پايدا بولسا، دەنە قىزۋى كوتەرىلىپ، ءيىس سەزۋدەن ايىرىلساڭىز، السىزدىك پەن تەرشەڭدىك سەزىنسەڭىز، بىردەن ماماندارمەن كەڭەسىپ، ەم- دوم الىڭىز.

- سۇقباتىڭىزعا راقمەت!

اۆتور: رۋسلان عابباسوۆ