كوروناۆيرۋسپەن بىرگە ءومىر ءسۇرىپ ۇيرەنۋىمىز كەرەك - انەستەزيولوگ- رەانيماتولوگ
ماماننىڭ پىكىرىنشە، COVID-19 ۆيرۋسى بار جانە بولا بەرمەك. قازىرگى مىندەت - ونىمەن بىرگە ءومىر ءسۇرىپ ۇيرەنۋ، دەپ حابارلايدى «قازاقپارات» ح ا ا ءتىلشىسى.
سولتۇستىك قازاقستان وبلىسىندا 2600-گە جۋىق مەديتسينا قىزمەتكەرى كوروناۆيرۋسپەن كۇرەسكە جۇمىلدىرىلعان. ولاردىڭ ءبىرقاتارى قاۋىپتى ينفەكسيا ورشىگەندە جۇمىس ىستەپ جۇرگەن جەرلەرىنەن پەتروپاۆلعا، ينفەكسيالىق ستاتسيونارلارعا اۋىستىرىلدى. سولاردىڭ ءبىرى - قىزىلجار اۋداندىق ورتالىق اۋرۋحاناسىنىڭ انەستەزيولوگ- رەانيماتولوگى ولجاس ەسەنەيەۆ.
قاراعاندى مەملەكەتتىك ۋنيۆەرسيتەتىنىڭ جانە استانا مەديتسينالىق ۋنيۆەرسيتەتىنىڭ تۇلەگى. قازىرگى ۋاقىتتا پەتروپاۆل قالالىق كوپسالالى اۋرۋحانا باس دارىگەرىنىڭ ستراتەگيالىق جوسپارلاۋ جانە قىزمەت ساپاسى بويىنشا ورىنباسارى بولىپ ەڭبەك ەتەدى.
«ءوزىمنىڭ نەگىزگى جۇمىس ورنىما تەزىرەك ورالعىم كەلەدى. ءۇشىنشى كۋرستا وقىپ جۇرگەن كەزىمنەن باستاپ رەانيماتولوگ- انەستەزيولوگ بولۋدى ارماندادىم. ول ارمانىم ورىندالدى. جاقسى كورگەن جۇمىسىڭمەن اينالىسقاننان اسقان باقىت جوق دەپ ەسەپتەيمىن. مەنىڭ جۇمىسىم قارقىندى تەراپيا جۇرگىزۋ. كوروناۆيرۋس ءورشىپ تۇرعان كەزدە ءبىزدىڭ ينفەكسيالىق ستاتسيونارعا وتە اۋىر حالدەگى ناۋقاستار جەتكىزىلىپ وتىردى. ولار نەگىزىنەن 65 جاستان اسقاندار جانە ۇزاق ۋاقىت بويى اۋىرعاندار، سونداي- اق ارتەريالدى گيپەرتەنزيا، قانت ديابەتى بارلار. كوروناۆيرۋس بۇل ناۋقاستاردىڭ پاتولوگياسىن قوزعاپ جىبەرگەن.
جالپى قاۋىپتى ۆيرۋستى جۇقتىرىپ، ول اسقىنعاندا وكپە زاقىمدانادى. بۇل قازىر بارىنە بەلگىلى. مۇندايدا ادام وزدىگىنەن دەم الا المايدى. ناۋقاسقا رەانيماتسيا مەن قارقىندى تەراپيا قاجەت. ءبىزدىڭ بولىمشەگە تۇسكەندە رەانيماتولوگتار مەن انەستەزيولوگتار، مەدبيبىلەر، سانيتاركالارى بار ۇلكەن كوماندا قارسى الىپ، تىنىس الۋىن قالپىنا كەلتىرۋ ءۇشىن جۇمىلا ىسكە كىرىسەدى. كوپ جاعدايدا سىرقات بىردەن وكپەنى جاساندى جەلدەتۋ اپپاراتىنا قوسىلادى، وتتەگى بەرىلىپ، ءدارى ارقىلى ۇيقىعا جىبەرىلەدى. قان قىسىمىن، جۇرەك قاعىسىن، قانداعى قانت دەڭگەيىن باقىلاي وتىرا بەلگىلەنگەن پروتوكولعا بايلانىستى ەمدەيمىز. نۇر- سۇلتانداعى ارىپتەستەرىمىزبەن ۇنەمى بايلانىس ۇستادىق. وبلىستىڭ باس ينفەكسيونيسى، باس رەانيماتولوگىنىڭ قاتىسۋىمەن ۇنەمى كونسيليۋمدار ءوتىپ تۇردى. بارلىعى بىزبەن بايلانىستى ۇزگەن جوق. ءبىز ءوزىمىزدى قيىندىقپەن بەتپە- بەت قالعانداي سەزىنگەنىمىز جوق، قولداۋ بولدى»، - دەيدى ولجاس ەسەنەيەۆ.
دارىگەردىڭ ايتۋىنشا، ولار ينفەكسيالىق ستاتسيوناردا جىلجىمالى كەستەمەن، جەكە قورعانىش كوستيۋمىمەن جۇمىس ىستەگەن. ەپيدەميولوگيالىق تالاپتاردى قاتاڭ ساقتاۋدىڭ ناتيجەسىندە قاۋىپتى ۆيرۋستى جۇقتىرعان جوق.
«تۋعاندارىمىزعا جۇقتىرامىز دەپ الاڭداماي جۇمىس ىستەۋ ءۇشىن قالاداعى ەڭ جاقسى قوناق ۇيلەردىڭ بىرىندە بارلىعىمىز ۇلكەن ءبىر وتباسى سياقتى تۇردىق. ءبىزدى قاجەتتىڭ بارىمەن قامتىدى. سول ءۇشىن دەنساۋلىق ساقتاۋ باسقارماسىنا، وبلىس اكىمىنىڭ اپپاراتىنا العىس ايتامىن. تۋىستارىمىزبەن، دوستارىمىزبەن تەلەفون، ءتۇرلى مەسسەندجەرلەر ارقىلى بايلانىسقا شىعىپ تۇردىق. مەن ءۇشىن جەكە قورعانىس قۇرالىن كيىپ جۇمىس ىستەۋ رەجيمىنە كوشۋ ەڭ قيىنى بولدى. ۇنەمى قورعانىس كيىمىمەن جانە ماسكا تاعىپ ءجۇرۋ فيزيكالىق جاعىنان عانا ەمەس، پسيحو- ەموتسيونالدى تۇرعىدان دا قيىندىق اكەلدى. ۇيرەنشىكتى ءومىر ءسۇرۋ سالتى وزگەردى، بۇرىن ىستەۋگە بولاتىن نارسەلەردىڭ كوبىنەن باس تارتتىم. ويتكەنى مەن جۇقپالى اۋرۋلار بولىمشەسىندە ەڭبەك ەتەمىن. سول سەبەپتى مەن ەپيدەميولوگيالىق تالاپتاردى قاتاڭ ساقتاۋعا مىندەتتىمىن»، - دەيدى دارىگەر.
ولجاس ەسەنەيەۆتىڭ پىكىرىنشە، كوروناۆيرۋستى جۇقتىرعاندار نەگىزىنەن سانيتارلىق تالاپتاردى ساقتاماعاندار نەمەسە بۇل ۆيرۋستىڭ بارلىعىنا ءشۇبا كەلتىرگەندەر.
«ءالى كۇنگە كوروناۆيرۋستىڭ بارلىعىنا سەنبەيتىندەر بار. بۇل ۆيرۋس بار، بولادى، ەشقايدا كەتپەيدى. وعان كونۋىمىز كەرەك جانە بۇل ينفەكسيامەن بىرگە ءومىر ءسۇرىپ ۇيرەنۋىمىز قاجەت. مەنىڭ بايقاعانىم، كوروناۆيرۋس ينفەكسياسىنان نەگىزىنەن 65 جاستان اسقان ادامدار زارداپ شەگەدى. سونىڭ ىشىندە قانت ديابەتى بارلار، قان قىسىمى جوعارى، سوزىلمالى جۇرەك جەتكىلىكسىزدىگى جانە اۋتويممۋندى اۋرۋى بارلار ۇيدەن شىقپاۋعا تىرىسۋلارى قاجەت. قوعامدىق ورىنداردا بولعان جاعدايدا مىندەتتى تۇردە قولدى سابىنداپ جۋعانى ءجون.
ماسكا تاعۋ، قولعاپ كيۋ، ءوز دەنساۋلىعىنا جاۋاپكەرشىلىكپەن قاراۋ ماڭىزدى. سونداي- اق يممۋنيتەتتى جاقسارتۋعا كەڭەس بەرەر ەدىم. يممۋنيتەت جاقسى بولسا، اۋرۋ جەڭىل وتەدى. ول ءۇشىن دارۋمەنگە باي تاعامدى تۇتىنىپ، كۇندەلىكتى رەجيمدى ۇستانۋ كەرەك. ياعني جەتكىلىكتى دەڭگەيدە دەم الىپ، ۇيىقتاۋ جانە ەموتسيالىق فوندى دا ۇمىتپاۋ. دۇرلىكپەۋ، بايبالامعا بەرىلمەۋ قاجەت. بۇل - يممۋنيتەتتىڭ تومەندەۋىنە اسەر ەتەدى. كىسى كوپ جينالاتىن جەرلەرگە بارماي جانە وسىعان وراي «ۇيات بولادى» دەگەندى قازىرگى جاعدايدا ۇمىتۋ قاجەت»، - دەيدى انەستەزيولوگ- رەانيماتولوگ.
اۆتور: اقەركە داۋرەنبەك قىزى