اۋعانستان ۇكىمەتى گۋمانيتارلىق كومەك ءۇشىن قازاقستانعا العىس ايتتى

كابۋل. قازاقپارات - بۇگىن قازاقستاننىڭ اۋعانستانداعى ەلشىسى ءالىمحان ەسەنگەلديەۆ اۋعانستاننىڭ دەنساۋلىق ساقتاۋ ءمينيسترى احماد دجاۆاد وسمانيمەن كەزدەستى، دەپ حابارلايدى قازاقپارات.

ق ر سىرتقى ىستەر مينيسترلىگىنەن ءمالىم ەتكەندەي، كەزدەسۋ بارىسىندا تاراپتار ەكى ەلدە كوروناۆيرۋس ينفەكتسياسىنىڭ تارالۋىنىڭ قازىرگى احۋالىن، دەنساۋلىق ساقتاۋ سالاسىنداعى ىنتىماقتاستىقتىڭ پەرسپەكتيۆالىق باعىتتارىن جانە ءوزارا قىزىعۋشىلىق تۋدىراتىن باسقا دا ماسەلەلەردى تالقىلادى.

«دەنساۋلىق ساقتاۋ ءمينيسترى كوروناۆيرۋس پاندەمياسى كەزىندە اۋعانستان حالقىنا كورسەتكەن كومەگى ءۇشىن قازاقستانعا ىزگى ريزاشىلىعىن ءبىلدىردى»، - دەدى ۆەدومستۆودان.

ءمالىم ەتىلگەندەي، قازاقستاننان جونەلتىلگەن گۋمانيتارلىق كومەكتى اۋعانستان يسلام رەسپۋبليكاسىنىڭ حالقىنا رەسمي تاپسىرۋ ءراسىمى بيىلعى 20- ماۋسىمدا حايراتون قالاسىندا ءوتتى.

«بارلىق سانيتارلىق-ەپيدەميولوگيالىق نورمالاردى ساقتاي وتىرىپ، ىشىندە 1900 توننا ۇن، 500 توننا ماكارون ونىمدەرى، 4 مىڭ ليتر كۇنباعىس مايى جانە 200 مىڭ قويۋلاتىلعان ءسۇت بانكالارى كىرەتىن 46 ۆاگون گۋمانيتارلىق جۇك جەتكىزىلدى. اتالعان ازىق-تۇلىك ونىمدەرىن ا ي ر ۇكىمەتى ەلدىڭ مۇقتاج ايماقتارىنا تاراتتى»، - دەپ ناقتىلادى ق ر س ءى م- نەن.