ەكى تۇركىستاندىق كارانتيندە توي جاساپ، قىزدارىن ۇزاتقان
ەنگىزىلگەن كارانتينگە بايلانىستى تۇركىستان وبلىسىنىڭ پوليتسيا دەپارتامەنتى كۇشەيتىلگەن رەجيمدەگى قىزمەتىن جالعاستىرۋدا. سانيتارلىق تالاپتاردىڭ ورىندالۋىن قاداعالاۋ، سونىڭ ىشىندە ادام كوپ جينالاتىن باسقوسۋلاردى، توي- جيىندار مەن ءىس- شارالاردى انىقتاۋ بويىنشا كۇندىزگى جانە تۇنگى رەيدتەر وتكىزىلەدى.
«سارى اعاش اۋداندىق پوليتسيا ءبولىمىنىڭ قىزمەتكەرلەرى كەزەكتى رەيد بارىسىندا ءۇيىنىڭ اۋلاسىندا تۋىستارىنىڭ باسىن قاۋىپ- قاتەرگە تىگىپ، قىز ۇزاتۋ جيىنىن جاساعان تۇرعىندى انىقتادى. بۇل جايتتى پوليتسەيلەر وزدەرىنىڭ كۇندىزگى رەيدتەرىنە كىرىسىپ، ۇيلەردى ارالاۋ بارىسىندا انىقتاعان. ءدال وسىنداي جايت كەنتاۋ قالاسىندا دا ورىن الدى. جەرگىلىكتى تۇرعىن كەنتاۋداعى مەيرامحانالاردىڭ بىرىندە قىز ۇزاتۋ تويىن جاساعانى انىقتالدى»، - دەدى پوليتسيا دەپارتامەنتىنەن.
اتالمىش ەكى فاكتى بويىنشا ق ر اكىمشىلىك قۇقىق بۇزۋشىلىق تۋرالى كودەكستىڭ 425- بابى «حالىقتىڭ سانيتاريالىق- ەپيدەميولوگيالىق سالاماتتىلىعى سالاسىنداعى زاڭناما تالاپتارىن، سونداي- اق گيگيەنالىق نورماتيۆتەردى بۇزۋ» بويىنشا حاتتاما تولتىرىلعان. «تۇركىستان وبلىسى پوليتسەيلەرى تۇرعىندارعا كارانتين كەزىندە زاڭ تالاپتارىنا سايكەس ارەكەت ەتىپ، ادامنىڭ كوپ شوعىرلانۋىنا جول بەرمەۋگە شاقىرادى. بۇل ءوزىڭىزدىڭ دە، وزگەلەردىڭ دە دەنساۋلىعى ءۇشىن دۇرىس بولماق»، - دەيدى ءتارتىپ ساقشىلارى.