COVID-19 ءورشىپ تۇرعان كەزدە شۇعىل ارادا جاساقتالعان ستاتسيونارلاردىڭ كەيبىرى بوساپ، ءبىرقاتار وڭىرلەردە وسى ۋاقىتقا دەيىن وزگە ناۋقاستاردى قابىلداماعان ەمحانالار مەن اۋرۋحانالار بۇرىنعى جۇمىستارىنا بىرتىندەپ قايتا ورالا باستادى. ءبىراق، ەركىنسۋگە ءالى دە ەرتە. سەبەبى كۇن سايىن جەر- جەردە كوروناۆيرۋس ينفەكسياسىن جۇقتىرعان ناۋقاستارعا قاتىستى دەرەكتەر تىركەلىپ جاتىر.
بۇگىن قازاقستان ۇكىمەتىنىڭ ونلاين رەجيمدە وتكەن وتىرىسىندا ەلىمىزدەگى ەپيدەميولوگيالىق احۋال قارالىپ، اتالعان ماسەلە بويىنشا بايانداما جاساعان ق ر دەنساۋلىق ساقتاۋ ءمينيسترى الەكسەي سويدىڭ ايتۋىنشا، قازاقستاندا 11- تامىزعا 100164 ناۋقاس تىركەلگەن. ونىڭ ىشىندە 25171 ناۋقاس ەم الىپ جاتىر. 73702 پاتسيەنت نەمەسە 73,6 پايىزى ەمدەلىپ شىقتى. 1091 ادام ومىردەن وزدى. ۆيرۋس رەپرودۋكتيۆتىلىگى نەمەسە 1 ناۋقاستىڭ وزگەلەرگە جۇقتىرۋ كورسەتكىشى 5 اپتالىق قاتاڭداتىلعان كارانتين شارالارىنا دەيىن 1,72 بولاتىن.
ال كارانتين ەنگىزىلگەن كەيىن ينفەكسيانىڭ رەپرودۋكتيۆتىلىك كورسەتكىشى تۇراقتى تۇردە تومەندەي باستادى جانە قازىرگى ۋاقىتتا 2 ەسەگە، ياعني 0,82-گە دەيىن ازايدى. بۇل رەتتە رەسپۋبليكا باسشىلىعىنىڭ ەلىمىزدىڭ دەنساۋلىق ساقتاۋ جۇيەسىنە جان- جاقتى جانە دەر ۋاقىتىندا قولداۋ كورسەتكەنىن اتاپ وتكەن ءجون. سونىڭ ناتيجەسىندە قىمباتقا تۇسەتىن دياگنوستيكالاۋمەن ناۋقاستاردى تەگىن قامتۋ ارتتى. بۇگىندە قازاقستان پتر دياگنوستيكامەن قامتۋ بويىنشا الەمدە 37-ورىندا تۇر.
«ەلدەگى اۋىرعاندار كورسەتكىشى وزگەرتىلىپ، تىركەلگەن جاعدايلار سانى ارتتى. قازىرگى ۋاقىتتا قازاقستان كوروناۆيرۋستىڭ تارالۋى بويىنشا الەمدە 43-ورىندا تۇر. انىقتالعان پاتسيەنتتەردىڭ دەر ۋاقىتىندا ءوزىن- ءوزى وقشاۋلاۋى، امبۋلاتوريالىق جانە ستاتسيونارلىق ەمدەۋمەن قامتۋ، سونىمەن قاتار بايلانىستا بولعان ادامداردى باقىلاۋعا الۋ اۋرۋدىڭ تارالۋىن تەجەۋگە، جاعدايى اۋىر ناۋقاستاردى باقىلاۋعا الۋعا مۇمكىندىك بەردى. قازاقستان دەر ۋاقىتتا كوروناۆيرۋستى دياگنوستيكالاۋدىڭ ناتيجەسىندە Covid-19-دان قازا تاپقاندار كورسەتكىشى بويىنشا 70-ورىندا تۇر»، - دەدى ول.
ايتا كەتەرلىگى، ەلىمىزدىڭ دەنساۋلىق ساقتاۋ مينيسترلىگى دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا بويىنشا ايماقتىق بيۋروسىمەن ءبىرقاتار تەحنيكالىق كونسۋلتاتسيالار وتكىزگەننەن كەيىن اۋرۋلاردىڭ حالىقارالىق جىكتەلۋىنىڭ كودتارىنا سايكەس COVID-19 جاعدايلارىن جاڭاشا كودتاۋعا جانە ەسەپكە الۋعا كوشكەن بولاتىن. ياعني، 1- تامىزدان باستاپ زەرتحانالىق راستالعان COVID-19 جاعدايلارى، سونىڭ ىشىندە پ ت ر تەرىس ناتيجەسى بار پنيەۆمونيا جاعدايلارى بىرىكتىرىلگەن ەدى. وسىعان وراي دەنساۋلىق ساقتاۋ مينيسترلىگى تامىز ايىنىڭ العاشقى 10 كۇنىنىڭ دەرەكتەرى نەگىزىندە رەپرودۋكتيۆتىك كورسەتكىشىنە قايتادان ەسەپتەۋ جۇرگىزىلىپ جاتىر. بۇعان قوسا قازاقستان كلينيكالىق- ەپيدەميولوگيالىق مالىمەتتەر نەگىزىندە زەرتحانالىق ناقتىلاۋسىز كوروناۆيرۋس ينفەكسياسى جاعدايلارىن تىركەۋدى العاشقىلاردىڭ ءبىرى بولىپ قولعا العان بولاتىن. «بۇل ەڭ ءبىرىنشى كەزەكتە ەل حالقىنىڭ ىندەت اۋقىمىن ءتۇسىنۋى ءۇشىن قاجەت بولدى»، - دەدى مينيستر.
ونىڭ اتاپ وتۋىنشە، ستاتيستيكاعا جاڭا ءادىس ەنگىزۋ توسەك- ورىن قورىن ايتارلىقتاي كەڭەيتۋ ەسەبىنەن ستاتسيونارلىق ەم الاتىن پاتسيەنتتەر سانىن بارىنشا ۇلعايتۋعا مۇمكىندىك بەردى.
«بۇل جۇزدەگەن ءومىردى ساقتاپ قالدى. ويتكەنى، ادام ءومىرىن ساقتاپ قالۋ ءۇشىن قاجەتتى دەم الۋدى جاساندى قولداۋ تەك ستاتسيونارلىق جاعدايدا عانا كورسەتىلەدى. كوروناۆيرۋس ىندەتىنە بايلانىستى جەدەل جاردەم شاقىرۋ 62 پايىزعا تومەندەدى. قابىلدانعان شارالاردىڭ ارقاسىندا دەنساۋلىق ساقتاۋ جۇيەسىنە جۇكتەمەنىڭ نەگىزگى كورسەتكىشتەرىن تومەندەتۋگە قول جەتكىزىلدى. ەلىمىزدە ورتاشا ەسەپپەن اۋرۋدىڭ تاۋلىكتىڭ ءوسىمى 2 ەسەگە جۋىق تومەندەپ، ەمدەلىپ شىققاندار سانى 73,6 پايىزعا ارتتى»، - دەدى الەكسەي سوي.
ەستە بولسا، ەلىمىزدە كوروناۆيرۋس ىندەتىن جۇقتىرعاندار سانىنىڭ كۇرت ارتىپ كەتۋىنە بايلانىستى مەملەكەت باسشىسى قاسىم- جومارت توقايەۆتىڭ تىكەلەي تاپسىرماسىمەن شىلدە ايىنىڭ 5-ىندە شەكتەۋ شارالارى كۇشەيتىلگەن بولاتىن. اراعا ەكى اپتادان استام ۋاقىتتان كەيىن، ناقتى ايتقاندا 23 - شىلدەدەن باستاپ ينفەكتسيانىڭ رەپرودۋكتيۆتىك كورسەتكىشى تۇراقتى تۇردە تومەندەي باستادى. بۇل كورسەتكىش 4 - تامىزدا 0,89-عا دەيىن قىسقارسا، بۇگىندە 0,82-گە دەيىن تومەدەدى.
بۇل رەتتە ەپيدەميولوگيالىق تۇرعىدان العاندا اتالعان كورسەتكىشتىڭ 1-دەن تومەن بولعانى ماڭىزدى. قازىرگى ۋاقىتتا بۇل كورسەتكىشكە تۇركىستان وبلىسىنان باسقا بارلىق ءوڭىر قول جەتكىزىپ وتىر. اۋرۋعا شالدىعۋ كورسەتكىشى دە 100 مىڭ ادامعا شاققاندا 56,73-تەن 36,2-گە دەيىن تومەندەگەن. الەكسەي سويدىڭ سوزىنە قاراعاندا، وسىنداي وڭ ديناميكا دەنساۋلىق ساقتاۋ جۇيەسىنە جۇكتەمەنىڭ ازايعانىن جانە نەگىزگى كورسەتكىشتەردىڭ جاقسارعانىن كورسەتەدى ءارى كارانتين شارالارىن كەزەڭ- كەزەڭمەن جەڭىلدەتۋگە مۇمكىندىك بەرەدى.
«بۇل جەڭىلدەتۋ قوعامدىق ورىنداردا ماسكا تاعۋ رەجيمى مەن گيگيەنانى قاتاڭ ساقتاي وتىرىپ، سونىمەن قاتار بارلىق اقپارات ارنالارىمەن حالىق اراسىندا ءتۇسىندىرۋ جۇمىستارىن جۇرگىزۋ ارقىلى اتقارىلۋى ءتيىس. كارانتيندى كەزەڭ- كەزەڭمەن جەڭىلدەتۋ بويىنشا قورىتىندى ۇسىنىستار كوميسسيانىڭ تاياۋ وتىرىسىندا ەنگىزىلەتىن بولادى»، - دەدى مينيستر.
وسى ماەەلەگە قاتىستى ءتۇيىن ءسوز ايتقان ق ر پرەمەر- ءمينيسترى اسقار مامين قابىلدانعان كەشەندى شارالاردىڭ ناتيجەسىندە ەلىمىزدەگى كوروناۆيرۋستىڭ تارالۋ دەڭگەيى جانە وسىعان بايلانىستى بارلىق كورسەتكىشتەردىڭ قارقىندى تومەندەۋى تىركەلىپ وتىرعانىنا باسا نازار اۋدارتتى.
«سونىڭ ىشىندە ۆيرۋستىڭ رەپرودۋكتيۆتىلىك دەڭگەيىنىڭ ورتاشا كورسەتكىشى 0,82 پايىزعا دەيىن تومەندەدى. ەمدەلىپ شىققانداردىڭ ۇلەسى 73,6 پايىزدى قۇراپ وتىر. قالعاندارى قاجەتتى ەم الىپ جاتىر. اۋرۋحانالاردىڭ جۇكتەمەسى 61 جانە جەدەل جاردەم شاقىرۋ 62 پايىزعا تومەندەدى. وسى ناتيجەلەر قابىلدانىپ جاتقان شارالاردىڭ تيىمدىلىگىن كورسەتەدى. قالىپتاستىپ وتىرعان ەپيدەميولوگيالىق جاعدايدى ەسكەرە وتىرىپ، دەنساۋلىق ساقتاۋ مينيسترلىگىنە كارانتين شارالارىن كەزەڭ- كەزەڭىمەن الىپ تاستاۋ جوسپارىن مەملەكەتتىك كوميسسيا قاراۋىنا بەيسەنبى كۇنى ەنگىزۋدى تاپسىرامىن»، - دەدى ۇكىمەت باسشىسى.
اۆتور: مارلان جيەمباي