قاسىم-جومارت توقايەۆ: «اباي تانۋ» وقۋلىعى مەن حرەستوماتياسىن ازىرلەۋ قاجەت

نۇر-سۇلتان. قازاقپارات - ابايدىڭ «تولىق ادام» ءىلىمى جان-جاقتى ءارى تەرەڭ زەرتتەلۋگە ءتيىس.

ق ر پرەزيدەنتى قاسىم-جومارت توقايەۆ Egemen Qazaqstan گازەتىندە جاريالانعان «اباي - رۋحاني رەفورماتور» اتتى ماقالاسىندا وسىلاي مالىمدەدى، دەپ حابارلايدى قازاقپارات.

«قازىر ەلىمىزدە ابايتانۋمەن اينالىساتىن بىرنەشە عىلىمي- زەرتتەۋ ورتالىعى بار. وسىلاردىڭ جۇمىسىن جۇيەلەپ، ەلوردامىزداعى اباي اكادەمياسىنىڭ توڭىرەگىنە توپتاستىرعان ءجون. اكادەميا بارلىق زەرتتەۋ مەكەمەلەرىنىڭ جۇمىسىن عىلىمي تۇرعىدان ۇيلەستىرۋشى مىندەتىن اتقارا الادى. الداعى ۋاقىتتا گۋمانيتارلىق پاندەردىڭ بولىنبەس بولشەگى رەتىندە «اباي تانۋ» كۋرسىن وقىتۋ ماسەلەسىن قولعا الۋ كەرەك. جاڭا فيلوسوفيالىق جانە ساياسي ۇستانىم تۇرعىسىنان «اباي تانۋ» وقۋلىعى مەن حرەستوماتياسىن ازىرلەۋ قاجەت. سونداي- اق ابايدىڭ «تولىق ادام» ءىلىمى جان-جاقتى ءارى تەرەڭ زەرتتەلۋگە ءتيىس. ءبىز ابايدى ⅩⅨ عاسىردا ءومىر ءسۇرىپ، 21- عاسىردىڭ ءسوزىن سويلەگەن دانىشپان رەتىندە الەمگە تانىتۋىمىز كەرەك»، - دەدى مەملەكەت باسشىسى.

قازاقستان پرەزيدەنتى سونىمەن قاتار ابايدى ۇلتتىق سانانى جاڭعىرتۋعا زور ىقپال ەتكەن رۋحاني رەفورماتور رەتىندە دارىپتەۋگە مىندەتتى ەكەندىگىمىزدى باسا ايتادى.

«تۇپتەپ كەلگەندە، ءاربىر قازاق ابايمەن ماقتانۋعا ءتيىس! حالقىمىزدىڭ ۇلى پەرزەنتىنىڭ تورقالى تويى قۇتتى بولسىن!»، - دەپ تۇيىندەيدى ويىن قاسىم-جومارت توقايەۆ.