ابايدىڭ «پايدا ويلاما، ار ويلا، تالاپ قىل ارتىق بىلۋگە» دەگەن وسيەتىن ءاردايىم ساناعا ءسىڭىرۋ قاجەت - پرەزيدەنت
ق ر پرەزيدەنتى قاسىم-جومارت توقايەۆ Egemen Qazaqstan گازەتىندە جاريالانعان «اباي - رۋحاني رەفورماتور» اتتى ماقالاسىندا وسىلاي مالىمدەدى، دەپ حابارلايدى قازاقپارات.
«اباي ءىلىمى بۇگىنگى ءبىرقاتار باعىتتارعا ورايلاس كەلەدى. ەڭ الدىمەن، ءبىلىم يگەرۋ. ءبىز بۇكىل الەمدى اقىل- وي مەن پاراساتتى پايىم ارقىلى عانا مويىنداتا الامىز. زامان تالابىنا ساي ءبىلىم الۋ ينتەللەكتۋالدى ۇلت قالىپتاستىرۋعا جول اشادى. ەكىنشى، تاربيە ماسەلەسى. سوندىقتان، وسكەلەڭ ۇرپاققا دۇرىس باعىت بەرگەن ءجون. اقىننىڭ «پايدا ويلاما، ار ويلا، تالاپ قىل ارتىق بىلۋگە» دەگەن وسيەتىن ءاردايىم ساناعا ءسىڭىرۋ قاجەت»، - دەدى قازاقستان پرەزيدەنتى.
مەملەكەت باسشىسى ءۇشىنشى، جاڭا كاسىپ يگەرۋ قاجەتتىگىنە باسا نازار اۋدارتادى.
«اقىن ءار قازاق ءوز ءىسىنىڭ شەبەرى بولسا دەپ ارماندادى. اسىرەسە باسەكەلەستىككە تولى الماعايىپ زاماندا مۇنىڭ ءمانى زور. اباي: «مال كەرەك بولسا، قولونەر ۇيرەنبەك كەرەك. مال جۇتايدى، ونەر جۇتامايدى» دەيدى. ءبىز ەڭبەككە، جاڭا ونەر يگەرۋگە دەگەن كوزقاراسىمىزدى تۇبەگەيلى وزگەرتۋگە ءتيىسپىز. بايلىقتىڭ دا، باقىتتىڭ دا كىلتى - ءوزىڭ سۇيگەن كاسىپتە. ءتورتىنشى، ىنتىماق ماسەلەسى. اباي ءاردايىم قوعامنىڭ بەرەكە- بىرلىگىن ارتتىرۋعا دەن قويدى. ول «ءبىرىڭدى، قازاق، ءبىرىڭ دوس، كورمەسەڭ ءىستىڭ - ءبارى بوس» دەپ، ەلدى تاتۋلىققا شاقىردى»، - دەدى قاسىم-جومارت توقايەۆ.