ەلوردادا «قۇستار ۇياسى فەستيۆالى» بايقاۋى وتەدى

نۇر- سۇلتان. قازاقپارات - ەلوردادا «قۇستار ۇياسى فەستيۆالى» ونلاين بايقاۋى وتەدى. مۇنداعى ماقسات - حالىقتىڭ ەكولوگيالىق مادەنيەتىن قالىپتاستىرۋ، دەپ حابارلايدى قالا اكىمدىگىنىڭ رەسمي سايتى.

وعان تابيعات پەن قۇستاردى قورعاۋعا قوعام نازارىن اۋدارۋعا نيەتتى كەز كەلگەن ادام قاتىسا الادى.

«ەكولوگيالىق ماسەلەلەردىڭ ۇلكەن شوعىرى اراسىندا قۇستاردى قورعاۋ پروبلەماسى بولەك. قارقىندى قۇرىلىس كەسىرىنەن ساياباقتار مەن جاي عانا اعاشتار ورنالاسقان الاڭدار سانى ازايۋدا. ساياباقتار مەن ءۇيدىڭ ماڭىنا قۇستار ۇيالارىن ورنالاستىرىپ، قۇستاردى جان- جاققا ءبولۋ ارقىلى جاسىل جەلەكتەردە باقىلاۋسىز كوبەيەتىن جاندىكتەرمەن كۇرەسۋگە بولادى، شارا وسىعان باعىتتالعان» ، - دەلىنگەن كونكۋرس ەرەجەسىندە.

قاتىسۋشىلار قۇس ۇياسىن جاساپ، ۆيدەوسىن @birgemiz_taza_alem Instagram پاراقشاسىنا جاريالاۋى ءتيىس. فەستيۆال قورىتىندىسى بويىنشا ءۇش جەڭىمپاز انىقتالىپ، 20 مىڭ تەڭگەدەن سىيلىق الادى. ۇيىمداستىرۋشىلار ەڭ جاقسى جۇمىستاردى قالا ساياباقتارىنا ورناتۋدى جوسپارلاپ وتىر. بايقاۋ 24 - شىلدە مەن 20 - تامىز ارالىعىندا وتەدى. ناتيجەلەر 26-28 - تامىز ارالىعىندا الەۋمەتتىك جەلىدەگى رەسمي پاراقشالاردا جاريالانادى. قوسىمشا اقپارات پەن ەرەجەنى @birgemiz_taza_alem Instagram پاراقشاسىنان تابۋعا بولادى.