ءوزىن- ءوزى «ۇرلاعان» ازەربايجان ازاماتى ۇستالدى
37 جاستاعى ازەربايجان رەسپۋبليكاسىنىڭ ازاماتى بۇعان دەيىن قازاقستانعا بىرنەشە رەت كەلگەن. سوڭعى رەت كەلگەندە تۋىستارىمەن الاياقتىققا بارۋعا بەل بۋعان.
«ول ءوزىن ەلگە جەمىس- جيدەك پەن كوكونىس جەتكىزۋشىسى رەتىندە تانىسىپ جۇرگەن. نۇر- سۇلتان قالاسىنان سەرىكتەس تاپقان. ءوزىن ءوزى «ۇرلاعاننان» كەيىن ءبىرىنشى بولىپ نۇر- سۇلتاندىق سەرىكتەسىنە بايلانىسقا شىققان. ءبىرىنشى ءوزىنىڭ سۋرەتىن، ودان كەيىن تالابىن ورىنداۋدى سۇراعان دىبىستىق حابارلاما جىبەرگەن. ولار كاسىپكەردەن 100 مىڭ دوللار كولەمىندە تولەم سۇراعان. ال كاسىپكەر بىردەن پوليتسياعا حابارلاسقان. ناتيجەسىندە بۇل ءتورت ادامنىڭ اكتەرلىك ويىنى ەكەنى انىقتالدى. ولار 37 جاستاعى باس فيگۋرانتتى وتىرعىزىپ، كيىمىن قانمەن بىلعاپ سۋرەتكە تۇسىرگەن»، - دەدى الماتى قالالىق پ د كريمينالدىق پوليتسيا باسقارماسىنىڭ باسشىسى ەركىن ىڭكاروۆ.
پوليتسەيلەر شەتەلدىكتى جالدامالى پاتەردە جايباراقات وتىرعان جەرىنەن تاپتى. سول جەردە قويىلىمنىڭ «رەجيسسەرلەرى» ، «سەناريستەرى» ۇستالدى. الماتى قالاسىنىڭ پ د تەرگەۋ باسقارماسى ءارقايسىسىنىڭ ارەكەتتەرىنە قازاقستان رەسپۋبليكاسىنىڭ زاڭناماسىنا سايكەس شارالاردى قولدانا وتىرىپ، قۇقىقتىق باعا بەرەتىن بولادى.