تۇرعىن ۇيلەردىڭ قابىرعاسىنا ابايدىڭ پورترەتى سالىندى
ۇلى اقىننىڭ پورترەتىن سالۋ ءۇشىن Tigrohaud Crew شىعارماشىلىق بىرلەستىگى الماتىدان جەرگىلىكتى اكىمدىكتىڭ شاقىرۋىمەن كەلدى. اباي پورترەتى قالاداعى كوپقاباتتى ۇيلەر مەن ساياباقتارعا ءىلىنىپ جاتىر.
پورترەتتىڭ جان-جاعىنا جارىق ديودتى شامدار ورناتىلعان. قازىرگى ۋاقىتتا اباي كوشەسىندەگى 16- ءۇيدىڭ قابىرعاسىنداعى كەسكىندەمە دايىن.
جالپى، تانىمال ستريت-ارتەرلەردىڭ وبلىس ورتالىعىنداعى جوسپارى كوپ.
«سۋرەتشىلەردىڭ قوستانايعا العاش كەلۋى ەمەس. بۇعان دەيىن كجبي اۋدانىنداعى قازاقتىڭ ۇلتتىق جازبا ادەبيەتى مەن ءتىلىنىڭ نەگىزىن قالاۋشى ابايدىڭ بەينەسى سالىنعان مۋرالدى بەكىتكەن ەدى. بۇل جولى مونۋمەنتالدى كەسكىندەمەنىڭ ءۇش تۋىندىسى جاسالادى. اۋەلى، اتاقتى عالىم، ورتا عاسىر فيلوسوفى ءال-ءفارابيدىڭ بەينەسى. ول اباي داڭعىلى مەن ءال-فرابي كوشەسىنىڭ قيىلىسىندا ورنالاسادى. ۇلى پەداگوگ-اعارتۋشى، جازۋشى، فولكلورشى جانە ەتنوگراف ىبىراي التىنساريننىڭ مۋرالى تاۋەلسىزدىك كوشەسىندە، سوۆەت وداعىنىڭ باتىرى سۇلتان بايماعامبەتوۆ بەينەلەنگەن پورترەت گوگول-بايماعامبەتوۆ كوشەلەرىنىڭ قيىلىسىندا بولادى. تاڭداۋ كەزدەيسوق بولعان جوق، وسى كورنەكتى تۇلعالاردىڭ بارلىعى قازاقستان تاريحىندا ماڭىزدى ءىز قالدىردى. جاڭا كورىكتى جەرلەر كەلەسى اپتانىڭ سوڭىنا دەيىن دايىن بولادى دەپ جوسپارلانۋدا»، دەلىنگەن باسقارما تاراتقان اقپاراتتا.