ماڭعىستاۋ تۇرعىندارى ەرەكشە قۇستى ۆيدەوعا ءتۇسىرىپ الدى

نۇر-سۇلتان. قازاقپارات - ەرەكشە قۇس جاڭاوزەندەگى مۇناي كەن ورىندارىنىڭ بىرىندە ۆيدەوعا ءتۇسىرىلدى.

بەينەروليككە ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتىندە تۇسىنىكتەمە بەردى، دەپ حابارلايدى قازاقپارات lada.kz سايتىنا سىلتەمە جاساپ.

ەكولوگتاردىڭ تۇسىندىرۋىنشە، بۇل قۇس - قاراباي، ۇشىپ قايتۋ كەزىندە ماڭعىستاۋ وبلىسىنداعى اعىن سۋلار اۋماعىندا كەزدەسەدى. قازىرگى كەزدە ولار مۇناي كاسىپورنىنان ۇشىپ كەتتى.

قاراباي - تۇمسىعى ۇزىن، دوعا تارىزدەس، كولەمى ورتاشا قۇس. جاز مەزگىلىندە كۇڭگىرت قىزىل- قوڭىر ءتۇستى، ماڭدايى، توبەسى، ارقاسى جانە قاناتتارى جاسىل، كۇلگىن ءتۇستى بولادى. قىستا استىڭعى جاعى قوڭىر، كۇلگىن ءتۇستى بولسا، باسى مەن مويىنىنىڭ جوعارعى بولىگى توپىراق تۇستەس- كۇڭگىرت بولىپ، قاۋىرسىندارىنىڭ ءتۇسى اق بولادى. اتالىعى انالىعىنان باسىنداعى ايدارىمەن ەرەكشەلەنەدى (انالىعىندا مۇنداي ايدار بولار- بولماس كورىنەدى نەمەسە مۇلدەم بولمايدى)، تۇمسىعى ازداپ قانا يمەك، كولەمى دە باسقا. سيراقتارى جاسىل- قارا ءتۇستى، تۇمسىعى، كوزىنىڭ جان-جاعى جاسىل- كۇڭگىرت ءتۇستى.

قاراباي - كاسپيدىڭ سولتۇستىك جاعالاۋى مەن جايىق پەن ورال ساعاسىندا ۇيا سالادى. بۇرىن سىرداريانىڭ تومەنگى جاعىن، تورعاي جانە ىلە ساعاسىن مەكەندەگەن. شوشقاكول كولىن دە مەكەن ەتۋى مۇمكىن. باتىس قازاقستان مەن كوشىمنىڭ تومەنگى جاعىندا، ماڭعىشلاق پەن ۇستىرتتە ۇشىپ- قونادى.

ناۋرىزىم قورىعىنا (1986 جانە 1989 -جىلى كوكتەمدە)، قورعالجىن (1971 -جىلدىڭ 7-ساۋىرىندە) جانە ىلە ساعاسىنا (1983 -جىلدىڭ 23-ساۋىرىندە 30 قۇس) ۇشىپ قونعانى بەلگىلەنگەن، دەپ باياندادى ەكولوگتار.