انتاركتيداداعى قىزىل سارقىراما
سولاردىڭ ءبىرى - انتاركتيدانىڭ شىعىسىنداعى «قاندى سارقىراما». اپپاق قاردىڭ بەتىندە وزەن بوپ اعىپ جاتقان قان قىزىل تاسقىن كورگەن جانعا ۇرەي تۋعىزارى انىق.
قىزىل سارقىرامانى العاش 1911 -جىلى اۋستراليا ساياحاتشىسى گريففيت تەيلور تاپقان. ونىڭ قىزىل سارقىراما جايلى ايتقاندارى ەلگە تەز تارادى، وعان قىزىعۋشىلىق تانىتقاندار، سىرىن اشىپ زەرتتەگىسى كەلگەندەر كوبەيدى.
العاشىندا زەرتتەۋ توبى سۋدا قىزىل بالدىر وسەدى، سودان قىزىل سۋ پايدا بولعان دەگەن توقتامعا كەلگەن. الايدا كەيىنگى زەرتتەۋلەر مۇنى جوققا شىعارىپ، سۋدىڭ حيميالىق قۇرامىندا تەمىر وكسيدىنىڭ كوپ ەكەنىن انىقتادى. تەمىر سۇيىقتىعى مولشەردەن كوپ بولعاندىقتان، سۋعا قىزعىلت ءتۇس بەرەتىن كورىنەدى.
ال توڭ ايازدا نەگە سارقىراما قاتپايدى دەگەنگە جاۋاپ - سۋى تۇزدى، قاتا قويۋى ەكىتالاي. سارقىرامانىڭ قالىپتى تەمپەراتۋراسى -10 گرادۋس.
ەڭ قىزىعى دا سول - تەمىرى مەن تۇزى كوپ سۋدا ءتىرى ميكروورگانيزمدەر ءومىر سۇرەدى. سۋداعى باكتەريالار تۇزدىڭ مينەرالدارىمەن قورەكتەنىپ ەنەرگيا الىپ، سۋىقتا ولمەيدى. بۇدان ءبىز تىرشىلىككە ەڭ قولايسىز دەگەن ورتانىڭ وزىندە تىرشىلىك بولاتىنىن، ايازى مەن سۋىعى قوس وكپەدەن قىسقان ايماقتىڭ ءوزى ءومىر سۇرۋگە جارامدى ەكەنىن بايقايمىز.
كول سارقىرامادان 1 شاقىرىم الىستا، 400 مەتر تەرەڭدە جاتىر. سۋ جەردىڭ ىشىنەن، مۇزدىقتىڭ استىنان شىعادى: بۇل دا ءبىر قىزىق جاعداي - ويتكەنى سۋدىڭ جوعارى قاراي اققانىن كورۋ تابيعاتتا سيرەك كەزدەسەتىن قۇبىلىس.
ال كول 3 ميلليون جىل بۇرىن پايدا بولعان. سىرەسىپ جاتقان توڭ مۇز قارا جەرگە قىسىم ءتۇسىرىپ، تۇبىندە جاتقان سۋ جوعارى قاراي جول تاپقان كورىنەدى.
massaget.kz