كاسىپكەرلەردى ونلاين ساۋداعا ۇيرەتەتىن كۋرستار باستالادى
ءتيىستى تاپسىرمانى ۇكىمەت جاۋاپتى مينيسترلىكتەر مەن «اتامەكەن» پالاتاسىنا جۇكتەدى، دەپ حابارلايدى قازاقپارات ءتىلشىسى.
«ەلەكتروندى ساۋدا - كولەڭكەلى ەكونوميكا كولەمنىڭ تومەندەۋىنە جانە كاسىپكەرلىكتىڭ وسۋىنە ىقپال ەتەتىن، قازاقستان ەكونوميكاسىن دامىتۋدىڭ باسىم باعىتتارىنىڭ ءبىرى. بيىلعى جىلدىڭ ءبىرىنشى جارتىجىلدىعىندا ەلەكتروندى ساۋدا نارىعىنىڭ جالپى كولەمى 2,2 ەسە ءوسىپ، 435 ميلليارد تەڭگەنى قۇرادى. ەلەكتروندى كوممەرتسيا نارىعىن دامىتۋدى ىنتالاندىرۋ بويىنشا بەلسەندى جۇمىس اتقارۋىمىز كەرەك. ول ءۇشىن بىرىنشىدەن وسى سەكتوردى ۇزاق مەرزىمدى قارجىلاندىرۋعا قول جەتكىزۋدى قامتاماسىز ەتۋ ماسەلەسىن تاعى دا قاراۋىمىز كەرەك. ەكىنشىدەن ءىرى قويمالاردان بولشەكتىك ساتىپ الۋشىلارعا دەيىن جەتكىزۋدىڭ لوگيستيكالىق تىزبەگىن قۇرۋ قاجەت. ول ءۇشىن قازپوشتانى جانە جەكەمەنشىك كۋرەرلىك كومپانيالاردى تارتۋ كەرەك. ۇشىنشىدەن ساۋدا جانە ينتەگراتسيا، ەڭبەك جانە حالىقتى الەۋمەتتىك قورعاۋ، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرى «اتامەكەن» ۇ ك پ- مەن بىرلەسىپ، كەڭ كولەمدە كاسىپكەرلەردى ونلاين تۇردەگى ساۋداعا ۇيرەتەتىن كۋرستاردى كەڭىنەن ەنگىزۋ قاجەت»، - دەدى ۇكىمەت باسشىسىنىڭ ءبىرىنشى ورىنباسارى ءاليحان سمايىلوۆ ۇكىمەت وتىرىسىندا.
ونىڭ ايتۋىنشا تۇتىنۋشىلاردىڭ قۇقىعىن تولىعىمەن قورعاۋ ماسەلەسى دە ماڭىزدى. قازاقستاندا ەلەكتروندى كوممەرتسيانى دامىتۋدىڭ 2025-جىلعا دەيىنگى جول كارتاسى ازىرلەنگەن.
«بۇگىنگى ايتىلعان ماسەلەلەردى ەسكەرە وتىرىپ، وسى جول كارتاسى شەڭبەرىندە بەلسەندى جۇمىس جۇرگىزۋىمىز كەرەك»، - دەدى ول. ەسكە سالساق، پرەمەر-مينيستر ەلەكتروندى ساۋدانى دامىتۋ بويىنشا تاپسىرمالار بەرگەن ەدى.