كوروناۆيرۋس: الماتىدا تاعى بىرنەشە گوسپيتال اشىلادى

بۇل تۋرالى الماتى قالاسىنىڭ اكىمى باقىتجان ساعىنتايەۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىنگى كۇنى كوۆيدپەن كۇرەسكە 27 مەديتسينا ۇيىمى تارتىلعان. جالپى توسەك قورى 6096 ورىندى قۇرايدى. توسەك-ورىنداردىڭ بوس بولماۋى 90 پايىزدان %50 عا دەيىن ازايدى. بۇگىنگى مالىمەت بويىنشا بۇل كورسەتكىش %42 عا تومەندەدى. پاندەميانىڭ ەكىنشى تولقىنىنا دايىندىق شەڭبەرىندە جاعدايى اۋىر ناۋقاستارعا ارنالعان ءبىرىنشى ەشەلون ستاتسيونارلارىنداعى ينفەكتسيالىق توسەك ورىندارىن 1015 ورىنعا كوبەيتەمىز»، - دەدى الماتى اكىمى ۇكىمەت وتىرىسىندا.

سونىمەن بىرگە، تامىز ايىنىڭ سوڭىنا دەيىن 500 ورىنعا ارنالعان جاڭا گوسپيتال پايدالانۋعا بەرىلەدى.

«ال قىركۇيەكتىڭ ورتاسىنا دەيىن 300 توسەك-ورىنعا ارنالعان تەز سالىناتىن تاعى ءبىر مودۋلدىك ينفەكتسيالىق گوسپيتالدى ىسكە قوسامىز. كەلەسى اپتانىڭ باسىندا قۇرىلىس الاڭىنا شىعامىز. 1- قازانعا دەيىن ەكى قوناق ءۇيدىڭ بازاسىندا جەكە ينۆەستيتسيالار ەسەبىنەن 215 توسەك-ورىندىق تولىققاندى كوۆيدتىك ەمحانالار قۇرىلاتىن بولادى. تامىزدىڭ سوڭىنا دەيىن پاتولوگواناتوميالىق بيۋرو ىسكە قوسىلادى»، - دەدى باقىتجان ساعىنتايەۆ.

ايتا كەتەيىك، الماتىدا 10955 COVID-19 جۇقتىرۋ جاعدايى تىركەلگەن. ونىڭ ىشىندە 6341 ادام نەمەسە %60 ەمدەلىپ شىققان، 73 ادام (%0,68) كوروناۆيرۋستان قايتىس بولعان.