ازىق- تۇلىك باعاسىن نەگىزسىز كوتەرگەندەردىڭ قالاي جازالاناتىنى بەلگىلى بولدى
بۇل سۇراققا ق ر ۇە م باسەكەلەستىكتى قورعاۋ جانە دامىتۋ كوميتەتى ءتوراعاسىنىڭ ورىنباسارى اسقار جاپپارقۇلوۆ جاۋاپ بەردى، دەپ حابارلايدى قازاقپارات ءتىلشىسى.
«الەۋمەتتىك ماڭىزى بار ازىق- تۇلىك تاۋار نارىعىن زەرتتەۋ بارىسىندا ءبىز باعانىڭ بەكىتىلۋ جەلىسىنە، نارىققا تاۋاردىڭ جەتكىزىلۋ جاعدايىنا تالداۋ جاسايمىز. ەگەر ادال باسەكەلەستىكتىڭ بۇزىلعانىن انىقتاساق، ءبىز كاسىپ يەلەرىن اكىمشىلىك جاۋاپكەرشىلىككە تارتامىز. ياعني كاسىپ يەسى ءسوز بايلاسۋ امالىمەن تاپقان پايداسىنىڭ 1-5 پايىز ارالىعىنداعى ۇلەسىن تولەيدى»، - دەدى اسقار جاپپارقۇلوۆ و ك ق- دا وتكەن باسپا ءسوز ءماسليحاتىندا.
كوميتەت ءتوراعاسىنىڭ ورىنباسارى ءسوزىن ناقتى مىسالدارمەن شەگەلەي ءتۇستى.
«الماتىدا كۇنباعىس مايىن ساتاتىن «پريما ديستريبيۋشون» ج ش س- عا قاتىستى ءىس بولدى. كەلىسىمشارتتارىن قاراي وتىرىپ، بۇل كومپانيا كۇنباعىس مايىن ساتۋ ءۇشىن ءارتۇرلى باعانى قولداناتىنىن انىقتادىق. بۇل - باسەكەلىك فاكتورى سانالمايدى. وسىعان بايلانىستى وعان قاتىستى ءىس جۇرگىزىلىپ، كومپانيا باسشىلىعى اكىمشىلىك جاۋاپكەرشىلىككە تارتىلدى»، - دەدى ول.
ەسكە سالا كەتسەك، بۇعان دەيىن ساۋدا جانە ينتەگراتسيا ۆيتسە- ءمينيسترى ازامات اسقار ۇلى جىل باسىنان 21-شىلدەگە دەيىن ازىق- تۇلىك تاۋارلارىنىڭ باعاسى 5,7 پايىزعا وسكەنىن ءمالىم ەتكەن ەدى. ايتسە دە بۇل سوڭعى بەس جىلداعى رەكوردتىق ءوسىم دەپ ايتۋعا كەلمەيدى. ازامات اسقار ۇلى 2016 -جىلى بۇل كورسەتكىش بىردەن 9,1 پايىزدىق، ال 2019 -جىلى 7,7 پايىزدىق ءوسىمدى كورسەتكەنىن ايتادى.