كوروناۆيرۋستىق ينفەكتسياعا قاتىستى جاعداي تۇراقتالدى - قۇمار اقساقالوۆ

پەتروپاۆل. قازاقپارات - سولتۇستىك قازاقستان وبلىسىندا پنيەۆمونيامەن اۋىرعاندار جانە كوروناۆيرۋستى ينفەكتسيانى جۇقتىرعاندار سانى كەمىپ، قاۋىپتى اۋرۋ شارىقتاۋ شەگىنەن ءوتتى، دەپ حابارلايدى قازاقپارات ءتىلشىسى.

س ق و اكىمى باسپا ءسوز قىزمەتىنىڭ مالىمەتىنشە، بۇگىن ءوڭىر باسشىسى قۇمار اقساقالوۆ پەتروپاۆلداعى كارديولوگيالىق ورتالىقتا بولىپ، وبلىستاعى ەپيدەميولوگيالىق جاعدايعا توقتالدى.

«كارانتيندىك شارالار ءوز ناتيجەسىن بەرىپ جاتىر. ۆيرۋستىڭ تارالۋى شارىقتاۋ شەگىنە جەتكەندە جەدەل جاردەم قىزمەتىن شاقىرتۋ 700 گە دەيىن كوتەرىلسە، قازىر 4 كەمىدى. جەدەل جاردەمگە جۇگىنەتىندەر سانى كۇننەن- كۇنگە ازايىپ كەلەدى. ينفەكتسيالىق جانە پروۆيزورلىق ستاتسيونارعا جاتقىزىلاتىندار سانى دا كەمىدى. بۇعان دەيىن ەمدەۋ مەكەمەلەرىنە 249 ادامنان ءتۇسىپ وتىرسا، وتكەن تاۋلىكتە 74 ناۋقاستى قابىلدادى. ءۇش ەسە كەمىدى. ياعني ءبىز پنيەۆمونيا مەن كوروناۆيرۋستى ينفەكتسيانى جۇقتىرۋدىڭ شارىقتاۋ شەگىنەن وتتىك»، - دەدى س ق و اكىمى قۇمار اقساقالوۆ.

وبلىستا ينفەكتسيالىق جانە پروۆيزورلىق ستاتسيونارلاردا جاتىن ورىن 6 ەسە ارتىپ، 2210 عا جەتكىزىلدى. كوروناۆيرۋس جانە پنيەۆمونياعا قاتىستى باسقا سىرقاتتاردى جوسپارلى تۇردە اۋرۋحاناعا جاتقىزۋ توقتاتىلسا، بۇگىننەن باستاپ بۇل جۇمىس جۇيەلى تۇردە قالپىنا كەلمەك. ءوڭىر باسشىسى ءدارى- دارمەك ماسەلەسى دە نازاردا ەكەنىن ايتتى.

«وبلىستىڭ ستاتسيونارلارىندا 16 كۇنگە جەتەتىن ءدارى- دارمەك قورى بار. كۇندەلىكتى ءدارىحانالاردا ىستىق تۇسىرەتىن، ۆيرۋسقا قارسى، انتيباكتەريالدى پرەپاراتتاردىڭ جانە ولاردىڭ بالامالارىنىڭ بولۋى جانە باعاسىنىڭ قىمباتتاماۋى بويىنشا باقىلاۋ جۇرگىزىلەدى. اۋىل تۇرعىندارىنا قاجەت ءدارى- دارمەكپەن جەرگىلىكتى مەديتسينالىق پۋنكتتەردى قامتۋعا اگرارشىلار كومەكتەسەدى. تۇرمىسى تومەن وتباسىلار ءۇشىن ولار تەگىن بولادى»، - دەدى قۇمار اقساقالوۆ.