مايرا مۇحامەد قىزى جارتاسقا ورمەلەپ ءجۇرىپ، ءان سالدى
تانىمال قازاقستاندىق وپەرا ءانشىسى مايرا مۇحامەد قىزى جانە تەلەجۇرگىزۋشى، بيزنەسۆۋمەن دينارا ءساتجان سىلەتى قۇزدارىنا باردى جانە سول ماڭداعى قوقىستى جيناپ، وزگە قازاقستاندىقتاردى دا تابيعي دەمالىس ايماقتارىنداعى تازالىققا شاقىردى.
«سىلەتى قۇزدارى نۇر- سۇلتاننان ەرەيمەنتاۋعا باراتىن باعىتتا ورنالاسقان. وندا سىلەتى وزەنى بار، قازاقستاننىڭ ەڭ تازا جانە ۇزىن وزەندەرىنىڭ ءبىرى. ءدال وسى وزەننىڭ بويىنداعى قۇزدارعا ورمەلەۋ ءۇشىن بارامىز. جەكە ءوزىم ەكى جىلدان بەرى قۇزعا ورمەلەۋمەن اينالىسامىن. وسى جولى مايرا مۇحامەد قىزىن شاقىردىق، ول العاش رەت قۇزعا ورمەلەپ، جارتاس باسىندا ءان سالدى»، - دەدى دينارا ءساتجان قازاقپارات تىلشىسىنە بەرگەن سۇحباتىندا.
سونىمەن بىرگە، ولار «قوقىس قالدىرما!» چەللەندجىن باستاپ، سىلەتى ماڭىنان 20 قاپقا جۋىق قوقىس جيناعان.
«سىلەتىگە تەك قۇزعا ورمەلەۋ ءۇشىن ەمەس، وزىمىزبەن بىرگە قوقىس قاپتارىن دا الىپ شىقتىق. ويتكەنى ونداعى جەر وتە لاس. ادامدار ءوز قوقىسىن دا جينامايدى، قاربىز اكەلىپ، قابىعىن سول كۇيى تاستاپ كەتەدى. جول بىلەتىن ادام بولماسا، بۇل جەردى تابۋ وتە قيىن. شومىلاتىن جەر دە از بولعاندىقتان، كوپ ادام كەلە بەرمەيدى. ايتسە دە، وزەن ماڭىنان 20 قاپقا جۋىق قوقىس جينالدى. سول ءۇشىن «قوقىس قالدىرما!» چەللەندجىن جاريالاۋدى ۇيعاردىق»، - دەدى دينارا ءساتجان.
اكتسياعا دينارا ءساتجان، مايرا مۇحامەد قىزى جانە وزگە دە قۇزعا ورمەلەۋشىلەر قاتىسقان.
پاراقشادا جاريالانعان ۆيدەودان وپەرا ءانشىسىنىڭ جارتاستان ءتۇسىپ كەلە جاتىپ، ءان شىرقاعانىن كورۋگە بولادى. ايتا كەتەيىك، مايرا مۇحامەد قىزى - قازاقتىڭ ەڭ اتاقتى وپەرا ءانشىسى (سوپرانو) ، قازاقستان رەسپۋبليكاسىنىڭ ەڭبەك سىڭىرگەن ءارتىسى، مەملەكەتتىك سىيلىقتىڭ لاۋرەاتى. پاريجدەگى «گراند وپەرادا» قازاقستان اتىنان ونەر كورسەتكەن تۇڭعىش ءارى ازىرگە جالعىز وپەرا ءانشىسى.