ارۋجان ساين ساتبايەۆتاعى وقيعا جايلى: بالانى قورلاعان ءار قىلمىسكەردىڭ جازالانۋىنا كۇش سالامىز

نۇر-سۇلتان. قازاقپارات - بالا قۇقىقتارى جونىندەگى ۋاكىل ارۋجان ساين ساتبايەۆتاعى وقيعاعا ارالاسىپ، بالانىڭ اناسىمەن جانە جاۋاپتى ورگانداردىڭ باسشىلارىمەن بايلانىستا وتىرعانىن ءمالىم ەتتى، دەپ حابارلايدى قازاقپارات ءتىلشىسى.

«دوستار! مەن ساتبايەۆتاعى وقيعا بويىنشا بالانىڭ اناسىمەن تەلەفون ارقىلى سويلەسىپ وتىرمىن. سوت- مەديتسينالىق ساراپتاما جۇرگىزىلدى. ءبىز ءارى قاراي جۇرگىزىلەتىن جۇمىستار، زاڭگەرلىك، پسيحولوگيالىق كومەك كورسەتۋ تۋرالى اڭگىمەلەستىك. بالا قۇقىعى جونىندەگى ۋاكىل رەتىندە مەن بۇل ءىستى بارلىق باعىت بويىنشا جۇرگىزەمىن»، - دەپ جازدى ارۋجان ساين Facebook پاراقشاسىندا.

ارۋجان ساين سونىمەن قاتار ىشكى ىستەر ءمينيسترى ەرلان تۇرعىمبايەۆپەن جانە قاراعاندى وبلىسى اكىمىنىڭ ورىنباسارى ابزال نۇكەنوۆپەن سويلەسكەنىن جەتكىزدى.

«مەن بۇل وتباسىنى وسى ىسپەن اينالىساتىن يۋۆەنالدى ادۆوكاتپەن بايلانىستىرۋدى ءوتىندىم. سونداي- اق مىقتى پسيحولوگ مامان دا ايقىندالدى. سەبەبى بالالارعا قاتىستى قىلمىستاردى تەرگەۋ بارىسىندا پسيحولوگتىڭ قاتىسۋى مىندەتتى. بالالارعا جاسالعان سەكسۋالدى زورلىق بويىنشا قىلمىستىق ىستەردى جۇرگىزىپ جاتقانىمىزعا بىرنەشە جىل بولدى. بالالارعا قارسى وسىنداي قىلمىس جاسايتىن ءار ادامنىڭ جازالانۋىنا بارىنشا كۇش سالامىز»، - دەيدى ول.

ەسكە سالا كەتسەك، بۇگىن ىشكى ىستەر ءمينيسترى ەرلان تۇرعىمبايەۆ ساتبايەۆتاعى بەس جاسار قىز بالانىڭ جوعالۋىنا قاتىستى وقيعانىڭ ءمان- جايىن ايتىپ بەرگەن بولاتىن.

«23-شىلدە كۇنى كەشكى ساعات 9 دا ساتبايەۆ قالاسىنىڭ ىشكى ىستەر باسقارماسىنا 5 جاسار قىزدىڭ جوعالعانى تۋرالى ارىز ءتۇستى. دەرەۋ ىزدەستىرۋ ناتيجەسىندە ءبۇلدىرشىن قالاداعى ءبىر ۇيدەن تابىلدى. جاس قىزدى زورلادى دەگەن كۇدىكپەن ءبىر ازامات قاماۋعا الىندى. ءبىراق بىرنەشە ادام كۇدىكتىنى ءوز قولىنا بەرۋدى تالاپ ەتتى، جانجال شىعاردى»، - دەدى ەرلان تۇرعىمبايەۆ و ك ق-دا وتكەن باسپا ءسوز ءماسليحاتىندا.

سونداي-اق، بۇگىن پرەزيدەنت شورناق اۋىلى مەن ساتبايەۆ قالاسىنداعى جاعدايعا بايلانىستى كەڭەس وتكىزدى.