مۇنداي زاڭبۇزۋشىلىقتى وبلىستىق پروكۋراتۋرا مەن پوليتسيا قىزمەتكەرلەرى انىقتاعان، دەپ حابارلايدى قازاقپارات ءتىلشىسى.
تۇركىستان قالاسىنىڭ پروكۋراتۋراسى مەن پوليتسيا قىزمەتكەرلەرى بىرلەسە وتىرىپ، ب. ساتتارحانوۆ داڭعىلى جانە ح. ا. ياسساۋي كوشەلەرىنىڭ قيىلىسىندا ورنالاسقان «فيركان» ازىق-تۇلىك دۇكەنىنە تەكسەرۋ جۇرگىزگەن.
تەكسەرۋ كەزىندە دۇكەن قوجايىندارى ءتيىستى ليتسەنزياسىز دارىلىك زاتتار مەن مەديتسينالىق بۇيىمداردى ساتىپ كەلگەنى انىقتالدى. ءبىراز ۋاقىت بويى ساۋدالانعان دارىلىك زاتتاردىڭ ىشىندە انالگين، گريپپگو، سترەپتوتسيد، تەرافليۋ، امپيتسيللين، نولگريپپ، نافتيزين جانە باسقا دا پرەپاراتتار تابىلعان.
وسىلايشا دارىلەر دۇكەن توڭازىتقىشىندا تۇرعان شۇجىق، ىرىمشىك، جۇمىرتقا جانە باسقا دا ازىق-تۇلىك تۇرلەرىمەن بىرگە ساتىلىپ كەلگەن.
«اتالعان دەرەك تۇركىستان قالالىق پوليتسيا باسقارماسىنىڭ تىزىمىنە تىركەلدى. دارىلىك زاتتار مەن مەديتسينالىق بۇيىمدار تاركىلەنىپ، دەنساۋلىق ساقتاۋ نىساندارىنا ۋاقىتشا ساقتاۋعا تاپسىرىلدى. ەندى دۇكەن يەسى «زاڭسىز فارماتسيەۆتيكالىق قىزمەتپەن اينالىسۋ» جانە «دارىلىك زاتتار مەن مەديتسينالىق بۇيىمداردىڭ اينالىمى بويىنشا قاعيدالاردى بۇزۋ» باپتارىمەن اكىمشىلىك جاۋاپقا تارتىلاتىن بولادى» دەلىنگەن وبلىستىق پروكۋراتۋرانىڭ حابارلاماسىندا.