كارانتين رەجيمىن بۇزعاندار قالاي جازالاندى - باس سانيتار
«قازىرگى ۋاقىتتا ەلىمىزدىڭ بارلىق وڭىرىندە كارانتيندىك شارالاردىڭ ساقتالۋىن تەكسەرەتىن 644 مونيتورينگتىك توپ بار. ولار اكىمدىك جانىنان قۇرىلعان جانە قۇرامىندا جەرگىلىكتى اتقارۋ ورگاندارىنىڭ، پوليتسيا قىزمەتىنىڭ جانە سانيتارلىق قىزمەتتىڭ وكىلدەرى بار. 5 - شىلدەدەن بۇگىنگى كۇنگە دەيىن مونيتورينگتىك توپتار كاراتين جاعدايىندا جۇمىس ىستەپ جاتقان 25438 نىساندى تەكسەردى. ونىڭ 12 پروتسەنتىندە نەمەسە 3 مىڭ نىساندا كارانتين تالاپتارىنىڭ بۇزىلعانى انىقتالدى»،- دەدى سپيكەر ورتالىق كوممۋنيكاتسيالار قىزمەتىندە وتكەن ونلاين بريفينگتە. ونىڭ ايتۋىنشا، كارانتيننىڭ العاشقى اپتاسىندا مونيتورينگ توپتارى كارانتين رەجيمىن بۇزعانداردى جاۋاپقا تارتپاي، ءتۇسىندىرۋ جۇمىستارىن عانا جۇرگىزگەن. وسىلايشا، مونيتورينگ توپتارى كاسىپكەرلەرگە 16 مىڭ ۇسىنىم بەرگەن. 742 نىسان وزدىگىنەن كاراتيندەگى جۇمىسىن توقتاتقان. «تەكسەرۋدە انىقتالاتىن نەگىزگى بۇزۋشىلىقتار - ماسكا تاقپاۋ، ارا قاشىقتىق ساقتاماۋ، قىزمەتكەرلەردى ماسكامەن جانە انتيسەپتيكپەن قامتاماسىز ەتپەۋ جانە ناۋرىز ايىنان بەرى تىيىم سالىنعان جاپپاي بۇقارالىق شارالار وتكىزۋ فاكتىلەرى دە تىركەلدى. ودان بولەك، سانيتارلىق- ەپيدەميولوگيالىق باقىلاۋ ورگاندارى جوسپاردان تىس 270 تەكسەرۋ جۇرگىزىپ، بارلىعىنان دەرلىك قۇقىق بۇزۋشىلىق تاپقان. تەكسەرۋ قورىتىندىسى بويىنشا اكىمشىلىك قۇقىق بۇزۋشىلىق تۋرالى 1036 حاتتاما تولتىرىلىپ، 202 ۇيعارىم بەرىلگەن. 23 كاسىپكەرلىك نىساننىڭ جۇمىسى توقتاتىلدى. تەكسەرۋ اياسىندا انىقتالعان قۇقىقبۇزۋشىلىقتار ءۇشىن 457 لاۋازىمدى تۇلعا 65 ميلليون تەڭگەگە جاۋاپقا تارتىلدى»،- دەدى ا. ەسماعامبەتوۆا. جەكە تۇلعالار اراسىندا 5 - شىلدەدەن باستاپ، 495 ادامعا 20 ميلليوننان استام تەڭگە ايىپپۇل سالىندى. اسىرەسە، الماتى قالاسى مەن تۇركىستان وبلىسىنىڭ تۇرعىندارى كوپ ەرەجە بۇزعان. قالعان وڭىرلەردىڭ بارلىعىندا ءبىرلى- جارىم قۇقىق بۇزۋشىلىقتار تىركەلگەن. بۇعان دەيىن سپيكەر ەكى اپتالىق كارانتيندە سىرقاتتار ءوسىمىنىڭ بولماعانىن مالىمدەدى جانە توي جاساۋدى توقتاتپاعان وڭىرلەردى اتادى.