اقجەلكەكتىڭ ادام دەنساۋلىعىنا پايداسى قانداي - مامان پىكىرى

نۇر- سۇلتان. قازاقپارات - ەل ىشىندە ەمگە ءدارۋ ەكەنى ءجيى ايتىلىپ جۇرگەن اقجەلكەكتىڭ (حرەن) ادام دەنساۋلىعىنا پايداسى قانداي؟

بۇل سۇراققا «Antikor Live « جوباسىندا بەرگەن سۇحباتىندا قازاق تاعام تانۋ اكادەمياسىنىڭ پرەزيدەنتى، مەديتسينا عىلىمدارىنىڭ دوكتورى تورەگەلدى شارمانوۆ جاۋاپ بەردى، دەپ حابارلايدى قازاقپارات ءتىلشىسى. «اقجەلكەك بولسىن، سارىمساق بولسىن - ادام دەنساۋلىعىنا پايداسى زور ەكەن دەگەن اڭگىمە ءجيى ايتىلىپ ءجۇر عوي. الايدا ءاربىر اۋرۋ بويىنشا كەز كەلگەن ءدارى ءشوپ نەمەسە ءدارى بولسىن 100 پايىز پايدا بەرەدى دەگەن اڭگىمە جوق. ستاتيستيكا بويىنشا ەڭ اسىپ كەتكەندە - 95-96 پايىز. ار جاعىندا 4-5 پايىز قالىپ قويادى ءبارىبىر. ال سول 4-5 پايىزدىق ەمدى بەرەتىن دارىلەر مەن شيپا - حالىق ەمشىلىگى. سول سەكىلدى 100 ادامنىڭ ىشىندە 4-5 ادامنىڭ اعزاسىنا ول جاقسى اسەر ەتۋى مۇمكىن. پايداسى تيەتىن ادامدار بار» ، - دەيدى تورەگەلدى شارمانوۆ. ونىڭ ايتۋىنشا ەل ىشىندە اۋىزدان- اۋىزعا تاراعان اڭگىمەدەن كەيىن كوكونىستىڭ كەيبىر تۇرىنە سۇرانىس سۇراپىل بولىپ كەتەدى. «كەيدە ەمدەۋدىڭ 90 پايىزدىق تيىمدىلىگى دالادا قالادى دا، كورشىنىڭ پايدالانعان ەمى سىزگە دە ەم بولىپ قونۋى مۇمكىن. بۇل جەردە ادامنىڭ كوڭىل- كۇيىنە دە كوپ نارسە بايلانىستى. پالاتاعا كىرىپ كەلەتىن دارىگەردىڭ بەت- ءجۇزى، كوزقاراسىنا قاراپ ناۋقاستىڭ اۋرۋى جەڭىلدەپ كەتۋى ىقتيمال. ول - پسيحولوگيا. سوندىقتان ادامنىڭ الدىمەن ەمدەلىپ كەتەتىنى بويىنشا سەنىمى بولۋى كەرەك. ءدارى ءبارىبىر 100 پايىز جازىلىپ كەتەتىنىڭىزگە جاۋاپ بەرمەيدى» ، - دەدى ول. ەسكە سالا كەتسەك بۇعان دەيىن تورەگەلدى شارمانوۆ ىندەت ورشىگەن قازىرگى جاعدايدا قانداي تاعام مەن سۋسىن تۇرلەرى پايدالى ەكەنىن ايتىپ بەرگەن بولاتىن. ونىڭ ايتۋىنشا قازىرگى ىندەت ورشىگەن جاعدايدا ءار ادام ۇيدەگى جاس ۇلكەن كىسىلەردىڭ جايىن ويلاۋى كەرەك.