اسحات ايماعامبەتوۆ جاڭا وقۋ جىلىندا «كەزەكشى سىنىپتار» قانداي تارتىپتە وقيتىنىن ءتۇسىندىردى

نۇر-سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ جاڭا وقۋ جىلىنىڭ ءبىرىنشى توقسانىندا ءداستۇرلى فورماتتا مەكتەپكە باراتىن «كەزەكشى سىنىپتار» قانداي تارتىپتە وقيتىنىن ءتۇسىندىرىپ بەردى، دەپ حابارلايدى قازاقپارات ءتىلشىسى.

«جاڭا وقۋ جىلىندا وقىتۋ ءۇردىسى قالاي جۇرگىزىلەتىنى تۋرالى تاياۋدا عانا شەشىم قابىلداعانىمىزدى بىلەسىزدەر. شەشىم مىناداي: جاڭا وقۋ جىلىنىڭ 1- توقسانىندا 1-11- سىنىپ وقۋشىلارى قاشىقتان وقيدى. الايدا كەيبىر نيۋانستار بار. اتاپ ايتقاندا الىس اۋىلدارداعى شاعىن جيناقتى مەكتەپتەرگە ءداستۇرلى تۇردە وقۋعا رۇقسات بەرەمىز. الايدا ول اۋىلداردىڭ وزىندە ءبىزدىڭ بالالار مەن پەداگوگتارعا ەشقانداي قاۋىپ بولماۋى ءتيىس»، - دەدى اسحات ايماعامبەتوۆ ونلاين كونفەرەنتسيادا.

ءبىلىم جانە عىلىم ءمينيسترى ەكىنشىدەن باستاۋىش سىنىپتار ءۇشىن دە ءداستۇرلى فورماتتا وقۋ مۇمكىندىگى بەرىلەتىنىن جەتكىزدى.

«قاشىقتان وقىتۋ فورماتىندا ەرەكشە قاجەتتىلىگى بار، از قامتىلعان وتباسىلاردىڭ بالالارعا وڭاي تيە قويمايتىنى انىق. ءۇشىنشى ماسەلە اينالىپ كەلىپ باستاۋىش سىنىپتاردىڭ وقىتۋ جۇمىسىنا تىرەلەدى. سول سەبەپتى «كەزەكشى سىنىپتار» دەگەن ەنگىزىلدى. ول نە؟ باستاۋىش سىنىپتا (1-4- سىنىپ) وقيتىن بالاسى بار اتا-انا بالاسىن ءداستۇرلى تۇردە مەكتەپتە وقىتۋعا ءوتىنىش بەرە الادى. وندا وقۋشىلارعا ونداي مۇمكىندىكتى بەرۋگە دايىنبىز»، - دەدى ول.

اسحات ايماعامبەتوۆ مەكتەپتە ءداستۇرلى وقۋ بارىسىندا ناقتى شەكتەۋ شارالارى قانداي بولاتىنىن ايتىپ ءوتتى.

«بىرىنشىدەن سانيتارلىق-ەپيدەميولوگيالىق تالاپتار قاتاڭ ساقتالۋى كەرەك. ادەتتە ءبىر سىنىپتا 20-25، ءتىپتى ۇلكەن قالالاردا 40 بالاعا دەيىن وتىرادى. وسىعان بايلانىستى اتا-انالارىنىڭ وتىنىشىمەن 1- توقساندا ءداستۇرلى فورماتتا وقيتىن سىنىپتاعى كابينەتتە 10-15 بالادان ارتىق وتىرماۋى كەرەك. ياعني ءبىر سىنىپتىڭ ءوزى توپتارعا بولىنەدى. ەكىنشىدەن وسى سىنىپتارعا قوڭىراۋلار ءارتۇرلى ۋاقىتتا سوعىلادى. ۇشىنشىدەن دەنە قىزۋى تۇراقتى تۇردە ولشەنىپ، بالالاردىڭ دەنساۋلىعى قاتاڭ باقىلاۋعا الىنادى. اتا-انالارعا مەكتەپ اۋماعىنا كىرۋگە تىيىم سالىنادى. «ءبىر مۇعالىم - ءبىر سىنىپ» قاعيداتى ەنگىزىلەدى. ادەتتە اعىلشىن ءپانىن وقىتاردا باسقا مۇعالىم كەلەدى. الايدا بۇل جەردە ونداي بولمايدى. باستاۋىش سىنىپتىڭ مۇعالىمى عانا ساباق وتكىزەدى. ءداستۇرلى فورماتتا وقىتۋعا بولادى دەگەن كۇننىڭ وزىندە ساباقتىڭ جارتىسىن ءبىز قاشىقتان وقىتۋ فورماتىنا اۋىستىرامىز. اعىلشىن ءتىلى ماسەلەن قاشىقتان وقىتىلادى»، - دەدى ول.

ءبىلىم جانە عىلىم ءمينيسترى 1- توقساندا ءداستۇرلى فورماتتا وقيتىن بالالار ءۇشىن مەكتەپتەگى اسحانا جۇمىس ىستەمەيتىنىن جەتكىزدى.