تۇركىستان- شىمكەنت اينالما تاسجولىندا ەرەجە بۇزعاندار جولدىڭ قارسى بەتىنە شىعىپ، كولىكتىڭ تەرەزەسىنەن شىعىپ وتىرعان، دەپ حابارلايدى قازاقپارات ءتىلشىسى.
الەۋمەتتىك جەلىلەردە كوشەنىڭ قاق ورتاسىندا جول قاۋىپسىزدىگى ەرەجەسىن بۇزىپ، جۇگەنسىز جۇرگەن بىرنەشە اۆتوكولىك جايلى بەينەجازبا تاراعان بولاتىن.
اتالعان بەينەكورنىستى تەكسەرگەن پوليتسەيلەر بۇل وقيعانىڭ تۇركىستان قالاسىندا بولعانىن انىقتاعان. ءتارتىپ بۇزۋشىلاردىڭ كىم ەكەنىن انىقتاۋ ماقساتىندا تۇركىستان پوليتسەيلەرى قاجەتتى ءىس- شارالاردى جۇرگىزىپ، كىنالى جۇرگىزۋشىلەردى اكىمشىلىك جاۋاپكەرشىلىككە تارتتى.
«تويوتا كامري» جۇرگىزۋشىسىنە قاتىستى 5 حاتتاما تولتىرىلدى.
اتاپ ايتقاندا، اكىمشىلىك قۇقىق بۇزۋ كودەكسىنىڭ 230-بابى 2-بولىگى، 590-بابى 2-بولىگى جانە 595-بابى 1-ءبولىمى، 593-بابى 1-بولىگى جانە 596-بابى 3-بولىگى بويىنشا جازالانادى. ال، «اۋدي» ماركالى كولىكتىڭ جۇرگىزۋشىسى كودەكستىڭ 593-بابى 1-بولىگى بويىنشا كىنالى دەپ تانىلىپ، حاتتاما ءتۇزىلدى. اۆتوكولىكتەر ايىپ تۇراعىنا قويىلدى» دەلىنگەن وبلىستىق پ د باسپا ءسوز قىزمەتىنىڭ حابارلاماسىندا.
ايتا كەتەيىك، الەۋمەتتىك جەلىدە وسى قۇقىق بۇزعانداردىڭ اراسىندا پوليتسيا قىزمەتكەرى بار دەگەن اقپارات تاراعان بولاتىن. قازىرگى تاڭدا بۇل ءجايت بويىنشا دا وبلىستىق پوليتسيا دەپارتامەنتى جەكە قاۋىپسىزدىك باسقارماسى تەكسەرۋ جۇرگىزىپ جاتىر.