قازاقستانعا گۋمانيتارلىق كومەك كورسەتكەن ەلدەر
ورتاق جاۋعا قارسى كۇرەستە كەز كەلگەن قارۋ قاجەت-اق. وسىنداي قيىن- قىستاۋ ۋاقىتتا مەملەكەتتەر ءوزارا كومەك قولىن سوزىپ جاتىر.
بۇگىندە قازاقستانعا 15 تەن استام ەل گۋمانيتارلىق كومەك كورسەتكەن. العاش بولىپ كومەك قولىن ا ق ش پەن دۇنيەجۇزىلىك دەنساۋلىق ساقتاۋ ۇيىمى سوزدى. قازاقستانعا كوروناۆيرۋسپەن بىرگە ناۋرىز ايىندا گۋمانيتارلىق كومەك تە كەلدى. ونىڭ ىشىندە جەكە باستى قورعاۋ قۇرال-جابدىقتارى بولدى.
ارادا ۇزاق ۋاقىت وتپەي ، كورشى قىتاي حالىق رەسپۋبليكاسى مەديتسينالىق قۇرال-جابدىقتاردى جىبەردى. ءساۋىر ايىنىڭ باسىندا قىتايدان كوروناۆيرۋستىڭ بار-جوعىن انىقتايتىن تەست، جەكە باستى قورعايتىن قۇرال جابدىقتار (قولعاپ، كوزىلدىرىك، حالات) جانە تاعى باسقا زاتتار كەلدى.
قىتاي بيلىگىنىڭ شەشىمىمەن قازاقستانعا تەك ورتالىق ۇكىمەت قانا ەمەس، ايماقتىڭ بيلىك تە قولدان كەلگەنشە كومەكتەستى. 4- ءساۋىر كۇنى اقتوبەگە باسقا گۋمانيتارلىق كومەك جۇگى ءتۇستى. جالپى سانى 720 مىڭ مەديتسينالىق ماسكا مەن 3 مىڭ قورعانىس كوستيۋمى جەتكىزىلدى.
ءدال وسى كۇنى الماتىعا وڭتۇستىك كورەيانىڭ گۋمانيتارلىق كومەك جۇگى كەلدى. كورەي بيلىگى كوروناۆيرۋستىڭ بار-جوعىن انىقتايتىن 1000 تەست بەردى.
سونداي-اق، قىتاي العاشقىلاردىڭ ءبىرى بولىپ قازاقستانعا دارىگەرلەرىن جىبەردى. نۇر-سۇلتانعا ۇشىپ كەلگەن 10 دارىگەر 5,5 توننا مەديتسينالىق قۇرال-جابىقتاردى بىرگە الا كەلگەن. ولار قىتايدا ءۇش ايعا سوزىلعان كوروناۆيرۋسقا قارسى كۇرەستە العان تاجىريبەلەرىمەن ءبولىستى.
بىرىككەن اراب امىرلىگى بولسا ەلىمىزگە ءبىر رەتتىك قولعاپ، مەديتسينالىق ماسكا، باحيلا، انتيسەپتيگى بار 13 توننا بولاتىن گۋمانيتارلىق كومەك جىبەردى. قاجەتتى زاتتار ەلىمىزدىڭ تۇپكى اۋداندارىنا ۇلەستىرىلدى.
13- ءساۋىر كۇنى پولشادان كوپ قولدانۋعا بولاتىن 10 مىڭنان اسا مەديتسينالىق ماسكا كەلدى. بۇعان قوسا گۋمانيتارلىق كومەكتىڭ ىشىنە قازاقستاندىق وقۋشىلار قاشىقتان وقۋ ءۇشىن نوۋتبۋكتەر قوسىلدى.
ءۇندىستاندا وقىعان قازاقستاندىق التى ستۋدەنت 18- ءساۋىر كۇنى الماتىعا كەلدى. ءدال وسى ۇشاقپەن ءۇندى بيلىگى كوروناۆيرۋسقا قارسى كۇرەستە قولدانىلاتىن 30 مىڭنان استام ءدارى-دارمەك بەرىپ جىبەرگەن.
ەلىمىزدە تەك كورشى ەلدەر مەن مەملەكەتتەر عانا ەمەس، جەكە كاسىپكەرلەر دە كومەك قولىن سوزىپ جاتىر. مىسالى، ءساۋىر ايىنىڭ ورتا تۇسىندا ازيانىڭ ەڭ باي ادامى دجەك ما قازاقستانعا 4,5 توننا بولاتىن گۋمانيتارلىق كومەك جىبەردى. ونىڭ ىشىندە 500 مىڭ مەديتسينالىق ماسكا، 5 مىڭ قورعانىش كيىمى، 50 مىڭ مەديتسينالىق قولعاپ پەن تەرمومەتر بار. وعان قوسا دجەك ما قورى جانە Alibaba كومپانياسى ەلىمىزدە كوروناۆيرۋستىڭ بار-جوعىن لەزدە انىقتايىن ەكسپرەسس-تەست پەن مەديتسينالىق قۇرال-جابدىقتار جىبەرەدى.
تۇركيانىڭ «Nobel Ilaç» فارماتسيەۆتيكالىق كومپانياسى ءساۋىر ايىندا الماتىعا مەديتسينالىق قۇرال- جابدىقتاردى جىبەردى. ال ، مامىر ايىندا تۇركيا بيلىگى 150 مىڭ مەديتسينالىق ماسكا، بەتتى جانە كوزدى قورعايتىن 150 قۇرال-جابدىق، 300 كومبينەزون جانە دەزينفەكتسيالاۋعا ارنالعان قۇرالدى جىبەردى.
كوروناۆيرۋستى ەمدەۋدە قولدانىلاتىن گيدروكسيحلوروحين ءدارىسىنىڭ 60 مىڭ داناسىن 28- ءساۋىر كۇنى پاكىستان ەلى ارنايى ۇشاقپەن جەتكىزدى.
جاپونيا مامىر ايىندا كوروناۆيرۋسقا قارسى كۇرەستە قولدانىلاتىن 12200 ءدارى-دارمەك جىبەردى. گۋمانيتارلىق كومەك ارنايى رەيسپەن جەتكىزىلىپ، جەرگىلىكتى اۋرۋحانالارعا ۇلەستىرىلدى.
كاتار بيلىگى 8,5 توننا بولاتىن گۋمانيتارلىق كومەك كورسەتتى. ونىڭ ىشىندە جوعارى ساپالى N95 رەسپيراتورلىق ماسكالارى، ارنايى كيىمدەر، قولعاپتار، قورعانىس كوزىلدىرىگى مەن حالاتتار بار.
جازدىڭ العاشقى ايىندا كورشى وزبەك ەلى كومەك قولىن سوزدى. كورشى ەلدەن 150 مىڭ مەديتسينالىق بەتپەردە، 2500 قورعانىس كيىمى، 150 مىڭ مەديتسينالىق قولعاپ، 1000 تەرمومەتر جانە 440 كەرەۋەت كەلگەن.
گرۋزيا قازاقستانعا 10 دانا جاڭا جاساندى تىنىس الدىرۋ اپپاراتىن گۋمانيتارلىق كومەك رەتىندە جىبەردى. قۇرىلعىلار نۇر-سۇلتانداعى مەديتسينالىق مەكەمەلەرگە تاپسىرىلدى.
ۆەتنام سوتسياليستىك رەسپۋبليكاسى ۇلتتىق جينالىسى (ۆەتنام پارلامەنتى) ەلىمىزدە كوروناۆيرۋستىڭ تارالۋىنا قارسى گۋمانيتارلىق كومەك ۇيىمداستىردى. ۆەتنامدىق پارلامەنتشىلەر گۋمانيتارلىق كومەك رەتىندە جىبەرگەن جەكە قورعانىس قۇرالدارى اتىراۋ وبلىسىنداعى مەديتسينالىق مەكەمەلەرگە جىبەرىلدى.
سىرتقى ىستەر ءمينيسترىنىڭ ورىنباسارى ەرجان اشىقبايەۆتىڭ دەرەگىنشە، ەلىمىزگە گۋمانيتارلىق جۇك رەتىندە 5 ميلليون 200 مىڭعا جۋىق مەديتسينالىق ماسكا، 98 وكپەنى جاساندى جەلدەتۋ اپپاراتى، 260 مىڭ تەست جۇيەسى، 3000 مىڭعا جۋىق تەپلوۆيزور مەن تەرمومەتر اكەلىندى.
«سىرتقى ىستەر مينيسترلىگى دەنساۋلىق ساقتاۋ مينيسترلىگىمەن بىرلەسىپ، ىندەت تاراعان كەزدەن باستاپ سىرتقى حالىقارالىق ارىپتەستەرىمىزدەن ءتيىستى قايىرىمدىلىق كومەكتى ەلگە جەتكىزۋ جۇمىستارىن جۇرگىزىپ كەلەدى. بۇل جۇمىس وتە اۋقىمدى.
بىرىنشىدەن، ىندەت جاھاندىق بولعاننان كەيىن ءبىز جۇمىسىمىزدى، ياعني، ءدارى-دارمەك ساتىپ الۋ نەمەسە شەتەلدەن قاجەتتى مەديتسينالىق قۇرىلعىلاردى، زاتتاردى اكەلۋ ماسەلەسىن دۇنيەجۇزىندەگى ۇلكەن باسەكەلەستىك جاعدايىندا ىسكە اسىرىپ جاتىرمىز. سوندىقتان مۇنى ەسكەرگەن ءجون. ەكىنشىدەن، گۋمانيتارلىق كومەك قانشالىقتى اۋقىمدى بولسا دا، ەڭ الدىمەن ، ەڭ ۇلكەن جۇك ۇكىمەتىمىزگە، رەسپۋبليكالىق بيۋدجەتكە ءتۇسىپ وتىر. ءبىراق، ەڭ ۇلكەن جاۋاپكەرشىلىگى جۇگى دەنساۋلىق ساقتاۋ مينيسترلىگىنە، دەنساۋلىق ساقتاۋ جۇيەسىندەگى ارىپتەستەرىمىزگە ءتۇسىپ وتىرعانى انىق»، - دەپ كەلتىرەدى ەرجان اشىقبايەۆتىڭ ءسوزىن coronavirus2020.kz سايتى.
قازاقستان سىرتقى ىستەر مينيسترلىگىنىڭ مالىمەتىنشە، ەلىمىزدە وڭتۇستىك كورەيا، جاپونيا جانە شۆەيتساريا كومەك قولىن سوزۋعا ءازىر. سونداي-اق، يزرايل قازاقستان دارىگەرلەرىنە بار بىلگەنىمەن بولىسۋگە دايىن ەكەنىن مالىمدەدى.