وسىلايشا 13338364 ادام كوروناۆيرۋس ينفەكتسياسىن جۇقتىرعان.
وكىنىشكە قاراي، پاندەميا 579 مىڭنان استام ادامنىڭ ءومىرىن جالمادى. بۇگىن الەم ەلدەرىنىڭ كوروناۆيرۋس ىندەتىمەن قالاي كۇرەسىپ جاتقانىن شولىپ كورمەكپىز.
يزرايل دەنساۋلىق ساقتاۋ ءمينيسترى يۋليي ەدەلشتەين يزرايلگە ەلدى تولىقتاي جاۋىپ تاستاۋدان عايىپتان تايىپ ءبىر عاجايىپ كەلىپ قۇتقارماسا، باسقا جول جوق ەكەنىن جاريا ەتتى.
يزرايلدىك Yedioth Ahronoth يزرايل گازەتىنىڭ جازۋىنشا، يۋلي ەدەلشتەين ەلدى جابۋدان باسقا امالدى بىلمەيدى. سەبەبى كۇن سايىن 2 مىڭ ادامنىڭ ك ۆ ي- ءدى جۇقتىرۋى ول ەلدەگى احۋالدى كۇردەلەندىرىپ بارادى.
ەدەلشتەين وكپەنى جاساندى جەلدەتۋ اپپاراتتارىنا مۇقتاجدىق ارتىپ، اق حالاتتىلاردىڭ ءبارى دە COVID-19 ىندەتىنە قارسى كۇرەسكە جۇمىلعانىن راستادى.
«مەن شەكتەۋ شارالارىنىڭ مۇمكىندىگىنە سەنبەيمىن. اۋرۋ جۇقتىرعاندار دەڭگەيى بىردەن تومەندەمەسە، ەلدى تولىقتاي جابۋعا از قالدىق»، - دەدى ەدەلشتەين.
***
كوپشىلىك برازيليانىڭ مەملەكەت باسشىسىنىڭ كوروناۆيرۋسپەن اۋىرعانىنان حاباردار. بۇل ەلدىڭ پرەزيدەنتىنىڭ COVID-19 بويىنشا تاپسىرعان تەستى ونىڭ كوروناۆيرۋستى تاعى دا جۇقتىرىپ العانىن كورسەتتى.
بۇل تۋرالى بىردەن بىرنەشە بۇقارالىق اقپارات قۇرالدارى، اتاپ ايتقاندا CNN Brazil، تاسس اقپارات كوزدەرى حابار تاراتتى.
جاير بولسونارۋدىڭ ءوزى جاعدايى جاقسى ەكەنىن ايتادى. ونىڭ قانىنداعى وتتەگىمەن قانىقتىرۋ پايىزى 96 دان 98 گە دەيىن ءوستى. كوپتەگەن ناۋقاسقا قاراعاندا وندا تىنىس الۋىندا پروبلەما بولماعان، ءدام سەزۋى جوعالماعان.
برازيليا باسشىسىنىڭ ايتۋىنشا، قان اناليزى قالىپتى ناتيجەنى كورسەتكەن. بۇعان دەيىن برازيليا پرەزيدەنتى گيدروكسيحلوروكيننىڭ ارقاسىندا ءوزىن جاقسى سەزىنەتىنىن مالىمدەگەن بولاتىن. ول ءالى كۇنگە دەيىن وسى پرەپاراتتى قابىلداپ جاتىر. تاياۋ كۇندەرى ول تاعى ءبىر كوروناۆيرۋس تەستىنەن وتپەك.
وسى تەستتىڭ ناتيجەسى ونىڭ بۇرىنعى جۇمىس رەجيمىنە ورالا الاتىنىن نەمەسە قايتادان وزدىگىنەن وقشاۋلاناتىنىن شەشەدى.
***
كولۋمبيا استاناسى بوگوتا كوروناۆيرۋستىق سوققىسىن «وزىنە قابىلداپ الدى». ۆيرۋستىڭ تارالۋىنىڭ ەڭ قيىن جاعدايى وسى ايماقتا بايقالعان. وندا 55056 ادام ۆيرۋس جۇقتىرعان. ەلدە ءبىر تاۋلىكتە 5 مىڭنان استام ادام ۆيرۋس جۇقتىرعان.
جالپى كوروناۆيرۋستى بۇل ەلدەگى 165169 ازامات جۇقتىرعان. ەلدە سوڭعى 24 ساعات ىشىندە 189 ناۋقاس كوز جۇمدى.
***
ءۇندىستان كوروناۆيرۋس ينفەكتسياسىن جۇقتىرۋ جاعدايى بويىنشا الەمدە ءۇشىنشى ورىندا تۇر. ءبىر تاۋلىكتىڭ ىشىندە ناۋقاستاردىڭ سانى 29,4 مىڭعا ارتىپ، جالپى 936181 ادامعا جەتتى.
319840 ادام ينفەكتسيادان ەمدەلىپ جاتىر. 592031 ادام جازىلىپ، 24309 ادام قايتىس بولعان.
ەلدىڭ ورتالىعىنداعى ماحاراشترا شتاتى ەڭ قاتتى زارداپ شەكتى. وندا كوروناۆيرۋس ينفەكتسياسىن جۇقتىرۋدىڭ ەڭ كوپ مولشەرى تىركەلدى (267,665 ادام، سوڭعى تاۋلىكتە 6741 جاعداي). ءۇندىستانداعى قازىرگى جاعدايعا بايلانىستى 300 ميلليوننان استام ادام قايتادان كارانتيندە ءومىر سۇرۋدە.
The Times گازەتى كوروناۆيرۋس جۇقتىرعانداردىڭ سانى ەلدە كۇرت ءوسىپ كەلە جاتقانىن حابارلادى. كەيبىر قالالار مەن شتاتتاردا شەكتەۋ شارالارى قايتا ەنگىزىلۋدە. ماسەلەن، بيلىك بيحار شتاتىنىڭ حالقىن 15 كۇندىك كارانتينگە جىبەرۋگە شەشىم قابىلدادى. بانگالور تۇرعىندارى دا ءبىر اپتا ىشىندە وقشاۋلانادى.
***
مەكسيكادا كوروناۆيرۋس جۇقتىرۋ جاعدايلارىنىڭ سانى 318 مىڭنان استى. بۇل تۋرالى مەكسيكا دەنساۋلىق ساقتاۋ مينيسترلىگىنىڭ باس ەپيدەميولوگى حوسە لۋيس الومياعا مالىمدەمە جاسادى. ءبىر تاۋلىك ىشىندە ەلدە 6149 جاڭا جاعداي انىقتالدى. بۇكىل الەم كوروناۆيرۋسپەن اۋىرماۋدىڭ جولىن ىزدەپ جاتسا، مەكسيكادا كوۆيد ينفەكتسياسىن ادەيى جۇقتىرعاندار دا بار.
ايماقتىق بيلىك بۇل ءۇشىن جازانى قاتايتىپ وتىر. قاساقانا جۇقتىرىپ العان مەكسيكالىقتار نۋەۆو- لەون شتاتىندا ءۇش جىلعا دەيىن باس بوستاندىعىنان ايىرىلۋى مۇمكىن نەمەسە 35 مىڭ پەسو (1,5 مىڭ دوللار) كولەمىندە ايىپپۇل تولەيدى.
تەلەۆيزيا تەلەارناسى ايماقتىق بيلىكتىڭ شەشىمى سەيسەنبىدە كۇشىنە ەنگەنىن حابارلادى.
ايماقتىق دەنساۋلىق ساقتاۋ باسقارماسىنىڭ باسشىسى مانۋەل دە لا تۇرعىندارعا ەسكەرتۋ جاسادى:
«ەگەر ءسىز كەز-كەلگەن اۋىر جۇقپالى اۋرۋدان زارداپ شەگىپ، باسقا ادامدارعا قاۋىپ توندىرسەڭىز، وندا ءسىزدىڭ ارەكەتىڭىز قىلمىس بولىپ سانالادى».
***
16- شىلدەدەگى جاعداي بويىنشا دانيادا كوۆيد-19 ينفەكتسياسىنىڭ 13092 جاعدايى تىركەلدى. وكىنىشكە قاراي، پاندەميا باستالعالى بەرى كوروناۆيرۋس 610 ادامنىڭ ءومىرىن قيىپ كەتتى.
12182 ادام تولىقتاي ەمدەلدى. دانيا بۇكىل الەم بويىنشا ۆيرۋس جۇقتىرعانداردىڭ سانى بويىنشا 68- ورىندا.
جاقىندا دانيا بيلىگى اۋەجايلار «قىزىل ايماقتارعا» ەنەتىن ايماقتاردان رەيستەردى قابىلدامايتىنىن مالىمدەدى. سونىمەن قاتار، مىڭنان استام ادام قاتىساتىن بارلىق ءىس-شارا توقتاتىلدى.