جەرگىلىكتى Yedioth Ahronoth گازەتىنىڭ جازۋىنشا، يۋلي ەدەلشتەين كۇن سايىن 2000 ادامنىڭ اۋرۋعا شالدىعۋى قاۋىپتى جاعداي ەكەنىن ايتا كەلە، ەلدى تۇتاس كارانتينگە جاۋىپ تاستاۋدان باسقا ىندەتتى توقتاتۋدىڭ ءتيىمدى امالىن بىلمەيتىنىن مويىندادى.
ەدەلشتەيننىڭ ايتۋىنشا، كۇندەلىكتى اۋرۋ جۇقتىرۋ دەڭگەيى 2000 عا دەيىن ءوسىپ، ونىڭ ىشىندە وكپەنى جاساندى جەلدەتۋ قۇرىلعىسىمەن تىنىس الاتىندار سانى 30 عا جەتسە، «ەل قيىن جاعدايعا تاپ بولىپ، اۋرۋحانالاردىڭ بارلىعى تەك COVID-19 پاتسيەنتتەرىن ەمدەۋگە كوشۋگە ءماجبۇر بولادى، بۇل جاعدايدا وزگە ءداستۇرلى قىزمەتتەر توقتاتىلادى».
«ەگەر ەشقانداي تاڭعاجايىپ وقيعا بولماي، ىندەتكە شالدىعۋ دەڭگەيى تومەندەمەسە نە بولادى؟ بىزدە ۋاقىت بولسا، تولىق شەكتەۋگە بارماي، ءىشىنارا شەكتەۋ شارالارىن ەنگىزۋدىڭ تيىمدىلىگىن باعامداپ كورەر ەدىك. تولىق شەكتەۋدى كەيىنگە قالدىرار ەدىك. بىرنەشە كۇن كۇتۋ كەرەك»، - دەدى يزرايل دەنساۋلىق ساقتاۋ ءمينيسترى.
ەدەلشتەين كوروناۆيرۋسقا قارسى كۇرەستە مەيرامحانالار مەن ويىن-ساۋىق ورىندارىن جابۋ سياقتى قوسىمشا شەكتەۋ شارالارىن قولدانۋدان باس تارتتى.
«مەن ءىشىنارا شەكتەۋ شارالارىنىڭ تيىمدىلىگىنە سەنبەيمىن. اۋرۋ جۇقتىرعاندار دەڭگەيى بىردەن كۇرت تومەندەمەسە، ەلدى تولىقتاي جابۋعا تۋرا كەلەدى»، - دەدى ول.
سونداي-اق، ول اۋرۋ جۇقتىرۋ دەڭگەيى تومەندەگەن كەزدە ونىڭ مينيسترلىگى ۋاقىتتى ءتيىمسىز پايدالانعانىن جانە «ەلدى تولىق جابۋ - جەڭىلىستى مويىنداعانمەن تەڭ» دەگەن پىكىرلەرمەن كەلىسپەيتىنىن مالىمدەدى.
«ەلدى تولىق جابۋ بارلىق ماسەلەنىڭ شەشىمى بولا المايدى. ءبىزدىڭ الەمدەگى باسقا ەلدەردەن ەش ايىرماشىلىعىمىز جوق»، - دەپ اتاپ ءوتتى يۋلي ەدەلشتەين.