ەپيدەميالىق احۋال جاقسارسا، ءداستۇرلى وقىتۋعا كەزەڭ-كەزەڭىمەن كوشەمىز - ب ع م

نۇر-سۇلتان. قازاقپارات - ق ر ءبىلىم جانە عىلىم مينيسترلىگى ەپيدەميالىق احۋال جاقسارعان جاعدايدا ءداستۇرلى وقىتۋ فورماتىنا كەزەڭ-كەزەڭىمەن كوشەدى.

بۇل تۋرالى ق ر ءبىلىم جانە عىلىم ۆيتسە-ءمينيسترى شولپان قارينوۆا ايتىپ بەردى، دەپ حابارلايدى قازاقپارات.

«ەڭ الدىمەن، بۇل جاعدايدا بالالار مەن پەداگوگتاردىڭ، جالپى حالىقتىڭ دەنساۋلىعىن ەسكەرۋىمىز قاجەت. ءبىلىم بەرۋ سالاسىنداعى قۇزىرلى ورگان رەتىندە مينيسترلىكتىڭ ساپالى ءبىلىم مەن بالالاردىڭ دەنساۋلىعى اراسىندا تەڭگەرىم تابۋى قاجەتتىگىن، وعان جاۋاپتى ەكەندىگىمىزدى تۇسىنەمىز. سانيتارلىق-ەپيدەميالىق احۋالعا قاراي ءار ايماقتا وقىتۋ فورماتىن اۋىستىرۋ بويىنشا شەشىم قابىلدانادى. ياعني، جالپى رەسپۋبليكا بويىنشا ورتاق ءبىر شەشىم قابىلدانبايدى. بارلىعى سانيتارلىق-ەپيدەميالىق احۋالعا بايلانىستى بولادى»، - دەدى ۆيتسە-مينيستر «اتامەكەن» ۇكپ وتكىزگەن ونلاين جينالىستا.

ونىڭ ايتۋىنشا، مينيسترلىك ءداستۇرلى وقىتۋ فورماتىنا كەزەڭ-كەزەڭىمەن كوشۋ بويىنشا جوسپار ازىرلەپ قويعان.

«ەگەر سانيتارلىق جاعداي جاقسارسا، ەڭ الدىمەن 1-5- سىنىپتار وقۋ پروتسەسىنە كىرىسەدى. بۇل ۋاقىتتا 6-11- سىنىپتار قاشىقتان وقىتىلادى. جاعداي تاعى جاقسارا تۇسسە، 6-11- سىنىپتار دا شتاتتىق رەجيمگە كوشىرىلەدى. مەكتەپتەردە سانيتارلىق قاۋىپسىزدىك شارالارى ساقتالادى»، - دەدى ش. قارينوۆا.