شەكتەۋ: تۇركياعا قازاقستاندىقتاردان كىمدەر ەركىن كىرە الادى

نۇر- سۇلتان. قازاقپارات - بۇگىننەن باستاپ تۇركيا قازاقستان ازاماتتارىنىڭ كەلۋىنە شەكتەۋ ەنگىزدى. بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ ءتوراعاسى تالعات لاستايەۆ ايتتى، دەپ حابارلايدى قازاقپارات ءتىلشىسى.

«مەملەكەتتىك كوميسسيا شەشىمىمەن ەرتەڭنەن باستاپ كارانتيندىك رەجيم ەنگىزىلەدى. ازاماتتىق اۆياتسيا سالاسىندا بۇكىل ىشكى رەيستەر ورىندالادى. ەشقانداي شەكتەۋ جوق. بۇگىنگى تاڭدا اپتا سايىن 45 باعىت بويىنشا 457 رەيس ورىندالادى. ولارعا ەشقانداي شەكتەۋ بولمايدى، جالعاستىرا بەرەمىز»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ اتاپ وتۋىنشە، حالىقارالىق باعىتتا بۇعان دەيىن اشىلعان تۇركيا مەن وڭتۇستىك كورەياعا عانا رەيستەر ورىندالادى.

«ءبىراق، كەشە ءبىز تۇركيا تاراپىنان رەسمي شەشىم الدىق. بۇگىننەن باستاپ تۇركيا ءبىزدىڭ ازاماتتارىمىزدىڭ ءوز ەلىنە كىرۋىنە شەكتەۋ ەنگىزەدى. سوندىقتان وڭتۇستىك كورەياعا عانا اۋە رەيستەرى قالادى. جاڭا رەيستەر اشىلمايدى»، - دەدى تالعات لاستايەۆ.

كوميتەت باسشىسىنىڭ ايتۋىنشا، تۇركيادا ۋاقىتشا تۇرۋعا جانە جۇمىس ىستەۋگە رۇقساتى بار قازاقستان ازاماتتارى بۇل ەلگە ەش كەدەرگىسىز كىرە الادى.

«وسىعان بايلانىستى رەيستەر بۇگىن دەيىن اۋە كومپانيالارىمىز تۇركياعا اپارعان جولاۋشىلاردى الىپ كەلۋ ءۇشىن ورىندالادى. اۋە كومپانيالارى تاراپىنان بارلىق مىندەتتەمەلەر تولىق ورىندالادى»، - دەدى ول.