قازاقستاننىڭ ءۇش وڭىرىندە كارانتين كۇشەيەدى
باتىس قازاقستان وبلىسىندا كوروناۆيرۋس جاعدايىنا بايلانىستى 27 جانە 28-ماۋسىمدا ازاماتتاردىڭ قوزعالىسى شەكتەلدى. جۇمىسقا باراتىن ازاماتتاردان باسقا ادامداردىڭ ءجۇرىپ-تۇرۋىنا شەكتەۋ قويىلادى. ۇيگە جاقىن ورنالاسقان دۇكەن مەن ءدارىحاناعا شىعۋعا بولادى. سونداي-اق شۇعىل جاعداي بويىنشا مەديتسينالىق ۇيىمدارعا شىعۋعا جانە ءۇي جانۋارلارىن سەرۋەندەتۋگە بولادى.
سەنبى جانە جەكسەنبى كۇندەرى 65 جاستان اسقان ادامداردىڭ كوشەگە شىعۋىن شەكتەۋ ۇسىنىلدى.
سونداي-اق كەلەسى نىسانداردىڭ جۇمىسى توقتاتىلادى: ساۋدا ءۇيى، ويىن-ساۋى ورتالىقتارى، ساۋدا نىساندارى، قوعامدىق كولىكتىڭ جۇمىسى توقتاتىلادى، ساياباق، سكۆەر، جاعالاۋ مەن باسقا دا دەمالىس ورىندارىنىڭ، فيتنەس- ورتالىقتار مەن جالپى سپورت نىساندارى.
قوعامدىق تاماقتانۋ ورىندارى تەك «جەتكىزۋ قىزمەتى» بويىنشا جانە الەۋمەتتىك قاشىقتىقتى ساقتاي وتىرىپ 30 ورىندىق، كوشەدە ورنالاسقان كافەلەرگە رۇقسات بەرىلەدى.
ءدال وسىنداي شەكتەۋ شارالارى اتىراۋ وبلىسىندا 27-28-ماۋسىم كۇندەرى ەنگىزىلەدى.
وسكەمەندە 27-ماۋسىمنان 11-شىلدەگە دەيىن جاڭا قاتاڭ كارانتين رەجيمى ەنگىزىلەدى. قالاداعى ەپيدەميولوگيالىق جاعداي اۋىر، سوڭعى جەتى كۇندەگى ءوسىم - 16,6 پايىز.
ءبىرىنشى كەزەكتە كولىك يەلەرى ءۇشىن وتكىزۋ رەجيمىن ەنگىزۋ جوسپارلانۋدا. قالا اكىمىنە ازاماتتاردىڭ جەكە اۆتوكولىك قۇرالدارىن پايدالانۋدى شەكتەۋ تاپسىرىلدى. قالا اۋماعىندا دەمالىس جانە مەرەكە كۇندەرى، سونداي- اق تۇنگى ۋاقىتتا جۇمىس كۇندەرى ساعات 22:00-دەن 05:00-گە دەيىن جەكە اۆتوكولىكپەن جۇرۋگە تىيىم سالىنادى. مەملەكەتتىك ءنومىردىڭ سوڭعى سانىن «جۇپ»، «تاق» ەرەجەسى بويىنشا مەملەكەتتىك ءنومىر بەلگىسىنە بايلانىستىرا وتىرىپ، تەك جۇمىس كۇندەرى عانا كولىكپەن جۇرۋگە رۇقسات بەرىلدى.
جاياۋ جۇرگىنشىلەردىڭ ءجۇرىپ- تۇرۋىنا وتكىزۋ قۇجاتى ارقىلى رۇقسات بەرىلەدى. ماسەلەن، ادامدارعا اق نەمەسە جاسىل تۇستەرگە بايلانىستى جۇپ نەمەسە تاق كۇندەرى شىعۋعا بولادى.
ودان بولەك، جەرگىلىكتى بيلىك تۇرعىندار ماسكالار تاعىپ، الەۋمەتتىك قاشىقتىقتى ساقتاپ، ءۇش ادامنان ارتىق جينالماۋىن قاداعالايتىن بولادى.