ەپيدەميا كەزىندە ەلوردادا جەدەل جاردەم جۇمىسى قالاي وزگەردى

نۇر-سۇلتان. قازاقپارات - قالاداعى كۇردەلى ەپيدەميولوگيالىق جاعدايعا بايلانىستى جەدەل جاردەم شاقىرۋلار سانى ارتتى، دەپ حابارلايدى ەلوردا اكىمدىگىنىڭ رەسمي سايتى.

نۇر-سۇلتانداعى جەدەل جاردەم بريگاداسىنىڭ سانى 150 گە دەيىن كوبەيتىلدى.

«بۇرىن ءبىزدىڭ قۇرامدا 118 بريگادا جۇمىس ىستەگەن. قوڭىراۋلار سانىنىڭ ارتۋىنا بايلانىستى ءبىز ولاردىڭ سانىن 150-گە جەتكىزدىك»، - دەدى قالالىق جەدەل جاردەم ستانتسياسىنىڭ ديرەكتورى مۇرات ورازبايەۆ.

ونىڭ ايتۋىنشا، كەلەسى اپتادا قالاداعى مەديتسينالىق كوللەدجدەردىڭ 70 تۇلەگى جەدەل جاردەم قىزمەتىنە قابىلدانادى.

«قالالىق جەدەل جاردەم ستانتسياسى تاۋلىك بويى جۇمىس ىستەيدى، ءقازىر بريگادالارعا ۇلكەن جۇكتەمە تۇسۋدە. قوڭىراۋلاردى قابىلداۋدى جاقسارتۋ ءۇشىن ءبىز 103 ديسپەتچەرلەرىنەن بەس پۋلت، ال بايلانىس ورتالىعىنان جەتى پۋلت قوستىق»، - دەدى م. ورازبايەۆ.

سوڭعى اپتادا نۇر-سۇلتاندا جەدەل جاردەم قىزمەتىنە تۇسەتىن جۇكتەمە ايتارلىقتاي ءوستى: وتكەن تاۋلىكتە شاقىرۋلار سانى 4,5 مىڭعا جەتتى (كوروناۆيرۋسقا دەيىن 1-1,5 مىڭ بولاتىن). ءبىر اپتادا قىزمەت كورسەتىلگەن شاقىرۋلار سانى 18 مىڭعا جۋىق، وتكەن تاۋلىكتە - 2800.

سونىمەن قاتار، تۇرعىندار جەدەل جاردەمگە تەلەگرام-بوتى ارقىلى دا جۇگىنە الادى. سونداي-اق، احۋالدىق ورتالىق جۇمىسىن باستادى - ماماندار ءبىر مەكەمەدە ناۋقاستاردىڭ تولىپ كەتپەۋى ءۇشىن ولاردى اۋرۋحانالارعا تاراتادى.