قازاقستان تۇراقتى اۋە رەيستەرىن قالپىنا كەلتىرەتىن ەلدەردىڭ سانىن ارتتىرۋدا

نۇر-سۇلتان. قازاقپارات - قازاقستان تۇراقتى حالىقارالىق اۋە رەيستەرىن قالپىنا كەلتىرەتىن ەلدەردىڭ ءتىزىمىن ۇزارتۋدا.

بۇل تۋرالى ق ر دەنساۋلىق ساقتاۋ مينيسترلىگىنىڭ كولىكتەگى باس سانيتارلىق دارىگەرى ءسادۋاقاس بايعابىلوۆ ءمالىم ەتتى، دەپ حابارلايدى قازاقپارات ءتىلشىسى.

«قازاقستان تۇراقتى حالىقارالىق اۋە رەيستەرىن قالپىنا كەلتىرەتىن ءبىرىنشى جانە ەكىنشى ساناتتاعى مەملەكەتتەر ءتىزىمى ۇزارتىلدى»، - دەدى ءسادۋاقاس بايعابىلوۆ و ك ق-دا وتكەن باسپا ءسوز ءماسليحاتىندا. ونىڭ ايتۋىنشا، ءبىرىنشى ساناتتاعى ەلدەرگە ماجارستان، ءۇندىستان، گەرمانيا، چەحيا، مالايزيا ەنگىزىلگەن.

«ءبىرىنشى ساناتتاعى ەلدەردەن كەلەتىن جولاۋشىلارعا شەكتەۋلەر جوق. بۇدان بۇرىن ءبىرىنشى ساناتتاعى مەملەكەتتەرگە ق ح ر، وڭۇستىك كورەيا، جاپونيا، گرۋزيا مەن تايلاند ەنگەن بولاتىن. ال ەكىنشى ساناتتاعى ەلدەردىڭ توبىنا مىسىر، ۋكراينا، پولشا، وزبەكستان، قىرعىزستان، تاجىكستان كىرگىزىلدى. ەكىنشى ساناتتاعى ەلدەردەن كەلەتىن جولاۋشىلارعا مىناداي شەكتەۋلەر بار: ك ۆ ي بويىنشا انىقتاما بولعان جاعدايدا - شەكتەۋ جوق. ال ەگەر انىقتاما بولماسا ولارعا كارانتين قىزمەتىنىڭ ماماندارى 48 ساعاتتىڭ ىشىندە پ س ر-تەستتەن ءوتۋى كەرەكتىگى نەمەسە 14 كۇندىك ءۇي كارانتينى تۋرالى ەسكەرتۋ بەرەدى»، - دەدى ءسادۋاقاس بايعابىلوۆ. انىقتاما 5 تاۋلىككە جارايدى.