دارىگەر ءنايلا المەنوۆا: بۇل ىندەتتى بىرلەسسەك قانا جەڭە الامىز

سەمەي. قازاقپارات - بۇگىندە سەمەي قالاسىندا كوروناۆيرۋسقا شالدىققاندار ازايماي تۇر.

وسى ورايدا ناۋقاستار سانىنىڭ ارتۋىنا بايلانىستى شاھارداعى حوسپيس بازاسىندا قوسىمشا 70 توسەك-ورىن ازىرلەنگەن.

بۇل جايلى قازاقپارات تىلشىسىنە №3-ەمحانانىڭ باس دارىگەرى ءنايلا المەنوۆا ايتىپ بەردى.

«سەمەيدە ءالى كۇنگە دەيىن دەرت جۇقتىرعاندار انىقتالىپ جاتىر. سوڭعى مالىمەت بويىنشا، كوروناۆيرۋس ينفەكسياسىنا شالدىققاندار سانى ماۋسىم ايىندا 2,8 ەسە ءوسىپ كەتكەن. بۇعان ءبىرشاما كارانتين شەكتەۋلەرىنىڭ الىنۋى، تۇرعىنداردىڭ وتباسىلىق شارالاردى وتكىزۋى - بىردەن ءبىر سەبەپ. دارىگەرلەر كۇندىز-ءتۇنى دامىل كورمەي جۇمىس ىستەۋدەمىز. ناۋقاستار سانى كوبەيە باستاعاندىقتان شقو دەنساۋلىق ساقتاۋ باسقارماسى قوسىمشا ستاتسيونار اشۋ جايلى شەشىم قابىلدادى. سونىڭ ءبىرى - سەمەيدەگى حوسپيس بازاسىنداعى 70 توسەك- ورىن بولىپ وتىر»، - دەيدى ءنايلا المەنوۆا.

ونىڭ سوزىنشە، قازىرگى ۋاقىتتا دارىگەرلەر ب ا ق وكىلدەرى مەن الەۋمەتتىك جەلىلەر ارقىلى حالىققا بارىنشا ءتۇسىندىرۋ جۇمىستارىن جۇرگىزۋدە. سونداي-اق سەمەيدە تۇرعىنداردى ماسكا كيۋگە شاقىراتىن چەللەندج باستالعان.

«وسىنىڭ ناتيجەسىنە جۇرت اراسىندا ماسكا كيىپ، جەكە باس گيگيەنا شارالارىن ۇستاناتىندار كوبەيىپ كەلەدى. ەگەر ءارقايسىمىز ءوزىمىزدىڭ، وتباسىمىزدىڭ دەنساۋلىعى ءۇشىن الاڭداساق، ساقتىق شارالارىن قاپەردە ۇستايىق. ماسكادان بولەك قولعاپ كيىپ، قايدا جۇرسەك تە الەۋمەتتىك قاشىقتىقتى بۇزباعان ءجون. بۇل ىندەتتى بىرلەسە ارەكەت ەتسەك قانا جەڭە الامىز»، - دەيدى دارىگەر.