قازىنا ىزدەۋشى ءبىر تۇندە ميلليونەرگە اينالدى
سانينيۋ لايزەر ەلدىڭ تاۋ- كەن قازۋ ونەركاسىبى مينيسترلىگىنەن جالپى سالماعى 15 كەلى تانزانيتتەردى تاپقانى ءۇشىن 2,4 ميلليون فۋنت ستەرلينگ ($3,4 ميلليون دوللار) الدى. «ەرتەڭ ساۋىق كەشى بولادى»، - دەيدى لايزەر مىرزا.
ەل پرەزيدەنتى دجون ماگۋفۋليدىڭ ءوزى لايزەر مىرزاعا حابارلاسىپ، ەرەكشە تابىسىمەن قۇتتىقتاعان. 52 جاستاعى سانينيۋ لايزەردىڭ ءتورت ايەلى، 30 دان اسا بالاسى بار. ول ساۋىق كەشىن ۇيىمداستىرۋ ءۇشىن سيىر سوياتىنىن ايتتى. لايزەر بولاشاققا جوسپارىن دا ءبولىستى. ول مانيارداعى تۋعان جەرىنە ينۆەستيتسيا قۇيعىسى كەلەدى.
«مەن ساۋدا ورتالىعى مەن مەكتەپ اشقىم كەلەدى. مەكتەپ مەنىڭ ءۇيىمنىڭ جانىندا بولادى. ول جاقتا بالالارىن مەكتەپكە اپارۋعا جاعدايى جەتپەيتىن كەدەي ادامدار كوپ».
ونىڭ ايتۋىنشا، بۇل وقيعا ونىڭ ءومىر سالتىن وزگەرتپەيدى، ول ارى قاراي دا ءوزىنىڭ 2000 سيىرىن باعا بەرەدى.
باعالى تاستىڭ ەرەكشەلىگى - ءتۇسىنىڭ ارتۇرلىلىگىندە. ونىڭ جاسىل، قىزىل، كۇلگىن جانە كوك ءتۇسى بولادى. ول وتە سيرەك كەزدەسەتىندىكتەن باعالى جانە ءمولدىر، ءتۇسى قانىق بولعان سايىن ونىڭ قۇنى دا جوعارى بولادى. لايزەر سەكىلدى التىن ىزدەۋشىلەر تانزانيتتى ىزدەۋگە مەملەكەتتىك ليتسەنزيا الادى. سوعان قاراماستان ەلدە تانزانيتتى زاڭسىز جولمەن ىزدەۋ كەڭ تاراعان. اسىرەسە، ءىرى كومپانيالارعا تيەسىلى شاحتا ماڭىندا وسىنداي وقيعالار ءجيى بولادى.
2017 -جىلى پرەزيدەنت ماگۋفۋلي اسكەريلەرگە الەمدەگى تانزانيت بار جالعىز مەكەن سانالاتىن مانيارداعى مەرەلاني كەن ورنىنىڭ اينالاسىنا 24 شاقىرىمدىق قابىرعا سوعۋدى تاپسىردى. ءبىر جىلدان كەيىن ۇكىمەت تاۋ- كەن ءوندىرىسى سەكتورىندا كىرىستىڭ ارتقانىن حابارلاپ، ونى قابىرعا ورناتۋمەن بايلانىستىردى.