الماتىدا جەدەل- جاردەم قىزمەتىن شاقىرتۋ نە سەبەپتى ارتقانى ءتۇسىندىرىلدى

نۇر- سۇلتان. قازاقپارات - الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ قالادا جەدەل- جاردەم قىزمەتىنە قوڭىراۋ شالۋ سانى ەكى ەسە ارتقانىن ايتتى، دەپ حابارلايدى قازاقپارات ءتىلشىسى.

«ەپيدەميا باستالعاننان بەرى قالادا جالپى 3530 جاعداي تىركەلدى. 2178 ادام ساۋىعىپ، ەمدەلىپ شىقتى. قايتىس بولعاندار سانى - 23. بۇگىندە قالا ستاتسيونارلارىندا 1398 ناۋقاس ەم الىپ جاتىر. اۋىرلىق دارەجەسى بويىنشا وتە اۋىر حالدە 19 ادام، اۋىر دارەجەدە – 173، ورتاشا دارەجەدە - 1044 جانە قاناعاتتانارلىق جاعدايدا 162 ادام تىركەلىپ وتىر»، - دەدى ك. نادىروۆ ورتالىق كوممۋنيكاتسيالار قىزمەتىندەگى ونلاين باسپا ءسوز قىزمەتىندە.

وسى ورايدا ول قالا بويىنشا ستاتسيونارلار مەن العاشقى سانيتارلىق- مەديتسينالىق كومەك كورسەتۋ ۇيىمدارىندا مەديتسينالىق كومەكتى ۇيىمداستىرۋ جۇمىستارى تولىققاندى جۇرگىزىلىپ جاتقانىن جەتكىزدى.

«تەك وتكەن اپتادا اۋرۋحانالارعا جاتقىزۋ مەن جەدەل- جاردەم قىزمەتىنە قوڭىراۋ شالۋ سانى ەكى ەسە ارتقان بولاتىن. ناۋقاستار سانىنىڭ ءوسۋى سەبەبىن قانت ديابەتى، جۇرەك اۋرۋلارى ارتەريالدى گيپەرتەنزيا سياقتى اۋرۋلارى بار پاتسيەنتتەردىڭ كوبەيۋىمەن بايلانىستى دەگەن قورىتىندىعا كەلىپ وتىرمىز. سونداي- اق، اۋرۋدىڭ اۋىرلىعى مەن پاتسيەنتتەردىڭ جاس اراسىنداعى بايلانىس انىق بايقالادى، ياعني جاي- كۇيى اۋىر جانە وتە اۋىر پاتسيەنتتەر اراسىندا 80 پايىزدان استامىن 60 جاستان اسقان ادامدار قۇرايدى»، - دەدى باسقارما باسشىسى.

تالداۋ ناتيجەلەرى بويىنشا 20-29 جاس ارالىعىنداعى ادامدار ءجيى جۇقتىراتىنىن كورسەتىپ وتىر، ولارعا اۋرۋعا شالدىعۋ جاعدايلارىنىڭ 35 پايىزى تيەسىلى. ال 60 جاستان اسقان ادامدار اراسىندا ينفەكسيا جۇقتىرۋ كورسەتكىشى 8,8 پايىز دەڭگەيىندە. ونىڭ سوزىنە قاراعاندا، جالپى ديناميكادا دەرتتىڭ اۋىر جانە وتە اۋىر دارەجەدە ءوتىپ جاتقان ناۋقاستاردىڭ كوبەيۋى بايقالادى.

اۆتور: رۋسلان عابباسوۆ