عالىم كەڭەسى: يممۋنيتەتتى كۇشەيتۋ ءۇشىن قۇس، جىلقى ەتىنىڭ سورپاسىن ءىشىپ، جۇمىرتقا جەۋ كەرەك

نۇر-سۇلتان. قازاقپارات - يممۋنيتەتتى كۇشەيتۋ ءۇشىن قۇس، جىلقى ەتىنىڭ سورپاسىن ءىشىپ، جۇمىرتقا جەۋ كەرەك.

مۇنداي كەڭەستى مەديتسينا عىلىمىنىڭ دوكتورى، پروفەسسور ەربولات دالەنوۆ بەردى، دەپ حابارلايدى قازاقپارات ءتىلشىسى.

«كوروناۆيرۋس ينفەكسياسى - ءبىزدىڭ ەلىمىزگە دە جەتكەن ىندەت. ينفەكسيا بارلىق جەردە ءجۇرىپ جاتىر. سوندىقتان ودان ساق بولۋىمىز، ءوزىمىزدى ساقتاۋىمىز كەرەك. كەيبىر ادام مۇنىڭ قاۋپىن جەتە تۇسىنبەي «مۇنداي اۋرۋ جوق، ساياسات» دەپ ءجۇر. بۇلاي ايتۋعا بولمايدى. ويتكەنى، قازىردىڭ وزىندە دۇنيەجۇزىندە 9 ميلليون ادام اۋىرىپ، ونىڭ 480 مىڭعا جۋىعى قايتىس بولدى. ەلوردامىزدا دا كۇشەيىپ بارادى. سوندىقتان حالقىما ايتارىم، وزدەرىڭىزدى، گيگيەنالىق رەجيمدى ساقتاڭىزدار. قولدى كىر سابىنمەن جۋىپ، مۇرىن ءىشىن دە وسى سابىنمەن تازالاڭىزدار. قول بەرىپ امانداسپاڭىزدار. 1-1,5 مەتر الەۋمەتتىك اراقاشىقتىق ساقتاڭىزدار. سوندا بۇل ۆيرۋس جۇقپايدى»، - دەدى پروفەسسور.

سونىمەن قاتار، ول ءار ادام كوروناۆيرۋس ينفەكسياسىنان قورعانۋى ءۇشىن ءوزىنىڭ يممۋنيتەتىن كۇشەيتۋى قاجەتتىگىن باسا ايتتى.

«يممۋنيتەتتى كۇشەيتۋ ءۇشىن دۇرىس تاماقتانۋ قاجەت. اقۋىزى كوپ تاماق تۇتىنعان ءجون. قۇس، جىلقى ەتى سورپاسىن ءىشىپ، جۇمىرتقا جەگەن جاقسى. ويتكەنى، ولار قان قۇرامىندا يممۋنوگلوبۋليندى كوبەيتەدى. سوندىقتان كۇندەلىكتى تۇتىناتىن تاعامنىڭ 30-40 پايىزى قۇس پەن مال ەتى، ال قالعان 60-70 پايىزى جەمىس-جيدەك بولۋى ءتيىس»، - دەدى ەربولات دالەنوۆ. مەديتسينا عىلىمىنىڭ دوكتورى ءسال تىماۋراتىپ قالعان كەزدە 1 ليتر قايناعان سۋعا 1 قاسىق اس سوداسىن سالىپ، ونىڭ بۋىمەن كۇنىنە ءۇش رەت تىنىس الۋ كەرەكتىگىن ايتادى.

سونىمەن قاتار ماسكا ىشىنە سپيرت شاشىلعان كىشكەنە داكە سالىپ، ونى 3 ساعات سايىن اۋىستىرىپ وتىرۋعا كەڭەس بەرەدى.