مەكتەپكە قۇجات قابىلداۋ ۋاقىتشا توقتاتىلدى

اقتوبە. قازاقپارات - اقتوبەدە ءبىرىنشى سىنىپقا قابىلداۋ كەيىنگە شەگەرىلدى، دەپ حابارلايدى قازاقپارات ءتىلشىسى.

«مەكتەپكە دەيىنگى ۇيىمعا، مەكتەپكە قابىلداۋ 1- تامىزعا دەيىن ۋاقىتشا توقتاتىلادى. سەبەبى ەمحانالاردىڭ كارانتينگە جابىلۋىنا بايلانىستى بالالاردىڭ دەنساۋلىعى تۋرالى 026/ۋ جانە 063/ۋ سەكىلدى انىقتامالارىن الۋ مۇمكىن بولماي وتىر. قۇجات تاپسىرىپ ۇلگەرمەگەن اتا-انالاردىڭ الاڭداۋىنا ەش نەگىز جوق. ەپيدەميولوگيالىق احۋال تۇراقتالعاننان كەيىن بالالار مەكتەپكە دەيىنگى ۇيىمعا، مەكتەپكە قابىلدانادى. بارلىعى بالالاردىڭ دەنساۋلىعى مەن ءومىر قاۋىپسىزدىگى ءۇشىن جاسالىپ وتىر. سونىمەن بىرگە كونسۋلتاتسيالىق كومەك كورسەتۋ ءۇشىن ءبىلىم باسقارماسىنىڭ جەدەل جەلى، سەنىم تەلەفوندارىنا 551792، 540352، 87020312522، باسقارما باسشىسى ل. ورازبايەۆانىڭ 87017220563 WhatsApp نومىرىنە حابارلاسۋعا بولادى»، - دەپ حابارلادى اقتوبە وبلىسىنىڭ ءبىلىم باسقارماسى.

ەسكە سالساق، بالاباقشالار جۇمىسى 25- ماۋسىمنان باستاپ توقتاتىلادى. كەزەكشى توپتار دا جۇمىس ىستەمەيدى.