ءيتتى وزىڭە باعىندىرۋ، ايتقانىڭدى بۇلجىتپاي ورىنداتۋ وڭاي ەمەس - كينولوگ شۋاق بالعابەك ۇلى
ناتيجەسىندە ءتارتىپ ساقشىلارى سان الۋان توسىن جاعدايدىڭ الدىن الىپ، قوعامدىق قاۋىپسىزدىكتى ساقتاۋ باعىتىندا وڭ ناتيجەگە قول جەتكىزەدى.
وسى ورايدا يتتەردى سول جۇمىسقا بەيىمدەپ، ماڭىزدى مىندەتتى زور جاۋاپكەرشىلىكپەن ورىنداي بىلەتىن كينولوگ ماماندار قىزمەتى جايىندا نە بىلەمىز؟
قازاقپارات ءتىلشىسى قىزىلوردا قالاسىنداعى زك-169/1 مەكەمەسىنىڭ باقىلاۋشى- كينولوگ مامانى شۋاق بالعابەك ۇلىنىڭ اتقاراتىن قىزمەتىن بارىسىن باعامداي وتىرىپ، ولاردىڭ قىزمەتىنە ءبىر ءسات زەر سالدى. كوپ ادام كينولوگيا عىلىمىن، كينولوگ ماماندىعىن كينومەن، كينوماتوگرافيامەن شاتاستىرۋى مۇمكىن. سەبەبى، اتاۋى ۇقساس، سونداي اسەر قالدىراتىنى انىق. شىن مانىندە، ول بۇرىن پايدا بولعان، بۇل ماماندىق يەلەرى يتتەردى قولعا ۇيرەتۋمەن اينالىسادى.
قىزىلوردا قالاسىنداعى ز ك-169/1 مەكەمەسىنىڭ باقىلاۋشى- كينولوگ مامانى شۋاق بالعابەك ۇلى بۇل قىزمەتكە كەلگەنىنە 10 جىلعا جۋىق ۋاقىت بولدى. سودان بەرى كينولوگ بولىپ جۇمىس ىستەيدى. ءوزى بالا كۇنىنەن ءيتتى جاقسى كورەتىن، اسكەردە جۇرگەندە كينولوگيا بولىمىنە قابىلداندى. سودان بەرى يتتەردى ۇيرەتىپ، ولاردى ءتۇرلى جۇمىستارعا باۋلىپ كەلەدى.
ءيىسشىل يتتەردى قالاي ۇيرەتەدى؟ بۇل جونىندە شۋاق ءوز ويىمەن بىلايشا ءبولىستى.
«ول ءۇشىن يتپەن مىقتى بايلانىس ورناتۋ كەرەك. سول كەزدە عانا ول دا ساعان سەنەتىن بولادى. كەز- كەلگەن قيىندىقتا سەنى ەشقاشان تاستامايدى. الدىمەن ونىڭ مىنەزىن ناقتىلاپ، نەنى جاقسى كورەدى، نەنى ۇناتپايدى دەگەن ساۋالدارعا جاۋاپ تابۋىڭ ءتيىس. سونىڭ ءبارىن ناقتى ءبىلۋىڭ قاجەت. جالپى، ۇيرەتۋ بارىسىندا ءيتتى ۇرۋعا بولمايدى. ول دا كەز-كەلگەن قيىن ساتتە ءوز يەسىنەن كومەك كۇتەدى. ول سويلەي الماعانمەن، ءتىلىن تۇسىنگەن ادامعا ونى ءىس- قيمىلمەن بىلدىرەدى. قازاق حالقى ونى جەتى قازىنانىڭ ءبىرى سانايدى. ءيتتى وزىڭە باعىندىرۋ، ايتقانىڭدى بۇلجىتپاي ورىنداتۋ وڭاي ەمەس. ولاردىڭ مىنەزى ادام بالاسى سەكىلدى حولەريك، سانگۆينيك، فلەگماتيك جانە مەلانحوليك بولىپ تورتكە بولىنەدى. ءدال سول سەكىلدى مىنەزىنە قاراپ، قاي ءيتتىڭ قاي سالادا جۇمىس ىستەۋگە بەيىم ەكەنىن انىقتاۋعا بولادى. ءوز باسىم اسكەر قاتارىندا قىزمەت ەتكەن جىلدارى ولاردى ۇيرەتۋدىڭ بارلىق قىر-سىرىن، ايلاسىن ۇيرەندىم. تاجىريبەلى مامانداردان ءبىلىم الدىم. سول سەبەپتى مەن ءۇشىن قازىر كينولوگيا ءومىرىمنىڭ ءبىر بولشەگىنە اينالدى»، - دەدى شۋاق بالتاباي ۇلى.
قىزىلوردا وبلىستىق قىلمىستىق اتقارۋ جۇيەسى دەپارتامەنتىنىڭ باسپا ءسوز مامانى دانا دوستانوۆانىڭ ايتۋىنشا، دەپارتامەنتتە كينولوگيا قىزمەتى 2013 -جىلى اشىلعان. بۇگىنگى تاڭدا مۇندا قىزمەتتىك 4 بەلگيالىق وۆچاركا بار. ولار ەسىرتكى زاتىن ىزدەپ، ادامدى اياق ءىزىنىڭ يىسىمەن تابادى.
تۇزەۋ مەكەمەسىنەن سوتتالعاندار قاشقان جاعدايدا نەمەسە ەسىرتكى تاسىمالدانسا، قىزمەتتىك يتتەر قىلمىستىڭ الدىن الۋعا اتسالىسادى.
«ماعان وسكار اتتى كىزمەتتىك يت بەكىتىلگەن. ول ادامدى ءىزىنىڭ يىسىمەن ىزدەپ تابادى. وسكار الماتى قالاسىنداعى كينولوگيا ورتالىعىندا العاشقى دايارلىقتا جاقسى ناتيجە كورسەتتى. بۇدان بولەك، وسكو جانە ليۋتىي اتتى ەسىرتكى ىزدەۋشى كىزمەتتىك يتتەر سول ورتالىقتان 2018 -جىلى العاشقى دايارلىق، بىلتىر قايتا دايارلىقتان ءوتتى. جاقسى كينولوگ باسقا ماماندىق يەلەرى سەكىلدى ءاردايىم ىزدەنىستە ءجۇرىپ، كاسىبيلىگىن، شەبەرلىگىن ارتتىرۋى ءتيىس. سونىڭ ءبىر جولى - حالىقارالىق يت كورمەلەرىنە قاتىسۋ. ول كينولوگتاردىڭ كاسىبي دەڭگەيدە ءبىر-بىرىمەن تاجىريبە، ءبىلىم الماسۋىنا جول اشادى. بۇگىندە ءوز باسىم ەلىمىزدىڭ بارلىق وڭىرىندەگى وسى سالادا قىزمەت ەتەتىن ماماندارمەن بايلانىسىپ، بىلمەگەنىمدى ۇيرەنىپ، بىلگەنىمدى ۇيرەتىپ ءجۇرمىن»، - دەدى ول.
كينولوگ بولۋ - يتپەن بىرگە ءجۇرۋ عانا ەمەس، ءيتتىڭ اناتومياسىن، فيزيولوگياسىن، پسيحولوگياسىن تەرەڭ زەردەلەۋ، ونىڭ اۋرۋلارىنا ەم ىزدەۋ، دۇرىس تاماقتاندىرۋ. بۇل ماماندىقتىڭ كوپشىلىك بىلە بەرمەيتىن قىر-سىرى كوپ. ولارعا كۇنىنە ەكى رەت، تاڭەرتەڭ جانە كەشكە قۇرامى دارۋمەنگە باي، ارناۋلى جەم-سۋ بەرىلەدى.
يمميتاتوردى پايدالانا وتىرىپ ەسىرتكى ءيىسىن ۇمىتىپ كالماس ءۇشىن كۇندەلىكتى 2 مارتە وقۋ جاتتىعۋ جۇرگىزىلەدى. ەڭ باستىسى، ماماندار ءۇشىن شىدامدىلىقپەن ماقساتتىلىق، تاباندىلىق پەن باقىلاعىشتىق قاسيەت قاجەت. اعا سەرجانت شۋاق بالعابەك ۇلىنىڭ كۇندەلىكتى قىزمەت بارىسىندا ز ك-169/5 مەكەمەسىنىڭ سىرت ايماعىن باقىلايدى. سونداي ساتتەردە مەكەمە اۋماعىنا تىيىم سالىنعان زاتتاردى سىرتتان لاقتىرۋعا كەلگەن ازاماتتاردى دەر كەزىندە انىقتاپ، ءتيىستى ورگاندارعا تاپسىرعان. «قىزمەتتىك ءيتتىڭ كومەگىمەن جىل باسىنان بىرنەشە كەلەڭسىز جاعدايدىڭ جولى كەسىلدى. ماسەلەن، مەكەمەگە تىيىم سالىنعان ۇيالى تەلەفون لاقتىرماق بولعان ءبىر ازامات ۇستالدى. وعان ق ر اكىمشىلىك قۇقىقبۇزۋشىلىق تۋرالى كودەكس بويىنشا ەسكەرتۋ جاريالاندى. ال مامىر ايىندا ءبىر ازاماتشا جازاسىن وتەۋشى جاقىنىنا ەسىرتكى وتكىزبەكشى بولدى. ول قىزمەتتىك يتتەردىڭ كومەگىمەن قولعا ءتۇستى. قازىر وعان بايلانىستى ق ر قىلمىستىق كودەكسىنىڭ 297 بابىنىڭ 1 بولىگىمەن ءىس جۇرگىزىلۋدە» - دەدى شۋاق بالعابەك ۇلى.
اۆتور: ءادىلجان ۇمبەت