ب ۇ ۇ وكىلدەرى قازاقستاندىق دارىگەرلەردى قۇتتىقتادى
«بيىل قازاقستانداعى مەديتسينا قىزمەتكەرلەرى كۇنى ايرىقشا قيىن جاعدايمەن تۇسپا-تۇس كەلدى. ب ۇ ۇ جۇيەسى اتىنان جانە ءوز اتىمنان قاۋىپتى ۆيرۋسپەن كۇرەسىپ جاتقان بارلىق دەنساۋلىق ساقتاۋ قىزمەتكەرلەرىنە شىن جۇرەكتەن العىس ايتقىم كەلەدى. ب ۇ ۇ قۇرىلعان ساتتەن باستاپ ءبىز دەنساۋلىققا، ادامي كاپيتالعا، الەۋمەتتىك جانە ەكونوميكالىق دامۋعا سالىنعان ينۆەستيتسيانىڭ - بولاشاققا سالىنعان ينۆەستيتسيا ەكەنىن تاعى دا راستايمىز. ب ۇ ۇ جۇيەسى قازاقستاننىڭ پاندەمياعا قارسى جاساعان بارلىق شارالارىن قولدايدى. قۇرمەتتى دەنساۋلىق ساقتاۋ سالاسىنىڭ باتىرلارى، ءبىز سىزدەرمەن بىرگەمىز جانە سىزدەرگە ۇلكەن سەنىم ارتامىز! سىزدەردىڭ باتىلدىقتارىڭىز ءۇشىن، قىزمەتكە ادالدىق پەن كاسىبيلىگىڭىز ءۇشىن راحمەت ايتامىز»، - دەدى ب ۇ ۇ قازاقستانداعى تۇراقتى ۇيلەستىرۋشىسى نوريماسا شيمومۋرا.
سونىمەن بىرگە ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش بۇگىنگى كۇندى زاماناۋي باتىرلارعا قۇرمەت كورسەتەتىن كۇن دەپ اتادى.
«بارلىق دارىگەرلەر مەن سانيتارلارعا، مەديتسينالىق قىزمەتكەرلەرگە ولشەۋسىز ەڭبەگى ءۇشىن العىسىم شەكسىز»، - دەدى ول.
«ءبىزدىڭ بالالارىمىزدىڭ دەنساۋلىعى، بولاشاق ۇرپاعىمىزدىڭ دەنساۋلىعى سىزدەردىڭ قولدارىڭىزدا. سىزدەردىڭ كاسىپقويلىعىڭىز بەن كاسىپكە دەگەن ادالدىعىڭىز پاندەميا كەزىندە ەرەكشە بايقالادى. مەديتسينا قىزمەتكەرلەرىنىڭ بارلىعىنا ۇلكەن قيىندىققا توتەپ بەرىپ، قازاقستان ازاماتتارىنىڭ دەنساۋلىعىن قورعاۋعا اتسالىسىپ جۇرگەندىكتەرىنە شىن جۇرەكتەن ريزاشىلىق بىلدىرگىم كەلەدى»، - دەيدى يۋنيسەفتىڭ قازاقستانداعى وكىلى ارتۋر ۆان ديزەن.
ايتا كەتەيىك، قازاقستاندا جىل سايىن ماۋسىم ايىنىڭ ءۇشىنشى جەكسەنبىسىندە مەديتسينا قىزمەتكەرلەرى كۇنى تويلانادى. بۇعان دەيىن ق ر دەنساۋلىق ساقتاۋ ءمينيسترى ەلجان ءبىرتانوۆ قازاقستاندىق مەديتسينا قىزمەتكەرلەرىن كاسىبي مەرەكەسىمەن قۇتتىقتادى.