قازاقستاندا ەت پەن ءسۇتتى اۋىلعا قاراعاندا قالالىقتار كوپ تۇتىنادى

نۇر-سۇلتان. قازاقپارات - قازاقستاندا ەت پەن ءسۇتتى اۋىلعا قاراعاندا قالا تۇرعىندارى كوبىرەك تۇتىنادى.

قازاقپارات بۇل تۋرالى ق ر ۇلتتىق ەكونوميكا مينيسترلىگى ستاتيستيكا كوميتەتىنە سىلتەمە جاساپ حابارلايدى.

قازاقستاندا كالورياسى از (رۇقسات ەتىلگەن شەكتەن تومەن) تاماقتار تۇتىناتىن حالىقتىڭ ۇلەسى %4,1 قۇرايدى. بۇل تۋرالى 2019-جىلى ءۇي شارۋاشىلىقتارىنا ىرىكتەمەلى تۇردە جۇرگىزىلگەن زەرتتەۋ ناتيجەسىندە بەلگىلى بولعان.

«2019-جىلى حالىق تۇتىنعان تاماق ونىمدەرىنىڭ ەنەرگەتيكالىق قۇندىلىعى كۇنىنە ورتاشا جان باسىنا شاققاندا 3254 ككالدى قۇرادى. اۋىلدىق جەردەگى حالىقتىڭ تاماقتانۋى قالالىق جەرگە قاراعاندا نەعۇرلىم كالوريالى (قۇنارلى) ەكەندىگىن اتاپ وتۋگە بولادى»، - دەلىنگەن اقپاراتتا.

ەلىمىزدىڭ بارلىق وڭىرىندە حالىق تۇتىناتىن تاماق ونىمدەرىنىڭ ناقتى ەنەرگەتيكالىق قۇندىلىعى ەڭ تومەنگى شەكتەن جوعارى ەكەنى انىقتالدى. ونىڭ ىشىندە تۇركىستان جانە شىعىس قازاقستان وبلىستارىندا - ەڭ جوعارى، نۇر-سۇلتان جانە شىمكەنت قالالارىندا ەڭ تومەنگى كورسەتكىش تىركەلدى.

«ەگەر حالىق تۇتىنعان تاماق ونىمدەرىنىڭ حيميالىق قۇرامىن قاراستىراتىن بولساق، وندا ەڭ جوعارى ۇلەس سالماعى كومىرسۋتەگىنە كەلەدى. اۋىلدىق جەردەگى حالىق راتسيونىنداعى كومىرسۋتەگىنىڭ ۇلەسى (نان ونىمدەرى جانە جارما ونىمدەرى) قالالىق جەرگە قاراعاندا جوعارى. قۇرامىندا اقۋىز جانە مايى وتە جوعارى (ەت جانە ەت ونىمدەرى، ءسۇت ونىمدەرى جانە جۇمىرتقا) ونىمدەردىڭ ۇلەسى اۋىلعا قاراعاندا قالا تۇرعىندارىندا جوعارى»، - دەلىنگەن ستاتيستيكالىق مالىمەتتە.