ادامداردىڭ بىرلىگى، ولاردىڭ ىزگى جانە شىنايى تىلەكتەرى ەلباسىنا كۇش بەرۋدە - ايدوس ۇكىباي
بۇل تۋرالى ەلباسىنىڭ باسپا ءسوز حاتشىسى ايدوس ۇكىباي ايتتى، دەپ حابارلايدى قازاقپارات.
ا. ۇكىباي ەلباسىدان كوروناۆيرۋستىڭ انىقتالۋى تۋرالى جاڭالىقتان تۋىنداعان قوعامدىق رەزونانسقا ن. نازاربايەۆتىڭ رەاكسياسى قالاي بولعانىن ايتىپ ءوتتى.
«ارينە، نۇرسۇلتان ءابىش ۇلى مۇنداي قولداۋ سوزدەرىن كورىپ جانە ەستىگەننەن - ءسۇيسىندى. بيبىگۇل تولەگەنوۆانىڭ ۆيدەوسالەمدەمەسىن تۇسىنىستىكپەن جانە قۋانا قابىلداعانىن ايتتى. ەلباسى وزگە مەملەكەت باسشىلارىنان بولسىن، كومبيناتتاردىڭ ەڭبەك ۇجىمدارىنان بولسىن، ءتۇسىپ جاتقان بارلىق تەلەگراممالار مەن حاتتاردى وقيدى. نۇرسۇلتان نازاربايەۆ ءۇشىن حاتتاردىڭ بارلىعى بىردەي قىمبات. ادامداردىڭ بىرلىگى، ولاردىڭ ىزگى جانە شىن كوڭىلدەن بىلدىرگەن تىلەكتەرى تۇڭعىش پرەزيدەنتكە كۇش بەرۋدە. وسى جىلدار بويى كوشباسشىمىز حالىق قولداۋىنىڭ ارقاسىندا عانا تاۋەلسىز جانە گۇلدەنگەن مەملەكەت قۇرۋ جولىنداعى كەز كەلگەن قيىندىقتار مەن اۋىرتپالىقتاردى جەڭىپ كەلدى»، - دەدى ا. ۇكىباي.
سونداي-اق ول تۇڭعىش پرەزيدەنت بۇگىن تاڭەرتەڭ الماتى وبلىسىندا تۇراتىن وقۋشى بالا نازار ناعاشىبەكتىڭ ۇندەۋىن وقىعانىن ايتتى.
«ەلباسى وسى وقۋشىعا، بارلىق قازاقستاندىق جانە وزگە مەملەكەت ازاماتتارىنا ريزاشىلىق ءبىلدىرىپ، جىلى قولداۋ سوزدەرى ءۇشىن العىس ايتتى. ارينە، بۇل كۇندەرى نۇرسۇلتان ءابىش ۇلىنىڭ وقۋشىمەن كەزدەسۋى مۇمكىن بولماس. ناعاشىبەك وقۋداعى جەتىستىكتەرى تۋرالى ايتقان ەكەن. سوندىقتان تۇڭعىش پرەزيدەنت قورى جەلىسى بويىنشا ءتۇرلى باعدارلامالارعا قاتىسۋعا شاقىرتۋ الۋى مۇمكىن»، - دەپ تۇيىندەدى باسپا ءسوز حاتشى.
ەلباسى نۇرسۇلتان نازاربايەۆتىڭ COVID-19-عا تاپسىرعان سىناماسى وڭ ناتيجە كورسەتكەنى بۇعان دەيىن حابارلانعان بولاتىن. بۇگىن ەلباسىنىڭ باسپا ءسوز حاتشىسى ايدوس ۇكىباي تۇڭعىش پرەزيدەنتتىڭ دەنساۋلىعىنا قاتىستى الاڭداۋعا نەگىز جوق ەكەنىن ايتتى. سونداي-اق ول قازاقستاندىقتاردىڭ بىرلىگى، ولاردىڭ ىزگى جانە شىن كوڭىلدەن بىلدىرگەن تىلەكتەرى نۇرسۇلتان نازاربايەۆقا كۇش بەرەتىنىن جەتكىزدى.